СҚО да биыл 53 мыңға жуық адам онкоскринингтен өтті

Әлеуметтік медициналық сақтандыру қорының облыстық филиалы директоры Айнагүл Давлетчинаның айтуынша, онкологиялық скринингтер тегін медициналық көмектің кепілдік берілген көлемінің тізбесіне енгізілген. Бұл жаңашылдық онкологиялық ауруларды ерте анықтауға оң әсер етпек.

- Өңірде МӘМС жүйесінде 91 038 мың адам сақтандырылмаған. Бүгінгі таңда онкоскрининг МӘМС жүйесіндегі сақтандыру мәртебесіне қарамастан барлық азаматтар үшін қолжетімді, - дейді Айнагүл Давлетчина.

Жыл басынан облыста сүт безі обырына – 16 868 адам, жатыр мойны обырына – 12 436 адам, колоректальды обырға 23 577 адам тексерілді.

- 30 жастан асқан әйелдер жатыр мойны обырына онкоскринингтен өтуі керек, жиілігі 4 жылда 1 рет. Бүгінгі таңда осы жастағы әйелдердің 90% қамту мақсаты тұр.

Сүт безі обырына 40 жастан бастап тексеріледі. Оның жиілігі екі жылда бір рет. Биыл әйелдердің 80% қамтылмақ.

Жасы 50-ден асқандарға қуық асты безінің қатерлі ісігіне онкоскрининг бар. Ерлердің 70 % қамту мақсаты тұр. Ер адамдар екі жылда бір рет тексерістен өтіп тұруы тиіс, - дейді филиал директоры.

Сонымен қатар, онкосринингтен онкологияға тұқым қуалайтын бейімділігі бар адамдар, созылмалы аурулары бар немесе жаман әдеттері - темекі шегетін, алкогольді шамадан тыс пайдаланатын адамдар ұлттық скринингтік бағдарламалар аясында өтуі керек.

- Енді 50-70 жас аралығындағы ер адамдарда ми қан айналымының жіті бұзылуын ерте анықтау скринингі көзделген. Бұл профилактикалық тексеру аурудың алғашқы белгілер пайда болғанға дейін анықтауға мүмкіндік береді. Адамның еш шағымы болмаса да бұл тексерулер қауіпті патологияларды ерте сатысында анықтауға және емдеуді уақытында бастауға көмектеседі, - дейді Айнагүл Давлетчина.

Онкоскрининг түрлері:

Маммография - қатерлі ісікті ерте анықтау үшін сүт бездерін зерттеу. Бұл 40 жастан асқан әйелдерге екі жылда бір рет өткізіледі.

Цитологиялық зерттеу (ПАП-тест) - 30 жастан асқан әйелдерді жатыр мойны обырына тексеру.

Колоноскопия - 50 жастан асқан ерлер мен әйелдерде тоқ ішек қатерлі ісігінің диагностикасы.

PSA сынағы (простатикалық спецификалық антиген) - ерлердегі қуықасты безінің қатерлі ісігін анықтауға арналған қан анализі.

Темекі шегушілер мен қауіп тобындағы адамдарда өкпе обырын ерте анықтау үшін өкпенің флюорографиясы және КТ жүргізіледі.

Жамбасты ультрадыбыстық зерттеу – әйелдерде ісіктерді диагностикалау өткізу үшін жүргізіледі. Сонымен қатар, созылмалы және әлеуметтік маңызы бар ауруларды ерте анықтау үшін профилактикалық тексерулер тұрақты негізде жүргізіледі.

Айнагүл Давлетчинаның айтуынша, скринингтік тексерістен бөлек 59 мыңға жуық адам профилактикалық тексерістен өтті. Облыста қант диабетін, артериялық гипертонияны, жүректің ишемиялық ауруын, глаукоманы, В және С вирустық гепатиттерін ерте анықтауға арналған скринингтер 40-76 жас аралығындағы ерлер мен әйелдер үшін 2 жылда 1 рет тегін жүргізіледі.

Ал скринингтен өту қажеттілігі туралы пациентке емханадан хабарласып, SMS-хабарламалар жібереді.

Бұған дейін медициналық скринингтен өтетін жұмысшы 3 күн демалыс алуға құқылы екенін жазған едік.