Табыс тапсаң, Таудай бол !

Кішкентайынан пі­сірген тамағы тіл үйіретін Жаннұр кейін осы істі кәсіпке айналдыруды көп ойланыпты. Оның талабын қолдаған азаматы мұздатқыш камера сатып әперіп, Жаннұр тапсырыспен түшпара мен манты әзірлеп сата бастайды. Алғаш болып  тапсырыс берген көршілерінің сұранысы іс аясын күн сайын кеңейе беруге сеп болыпты. Кәсіпте алғашқы табысқа тоқмейілсігендердің дені көп ұзамай тоқырауға тап болады. Жаннұр іздене жүріп әлеуметтік желіден үй жағдайында шұжық жасауға қызығушылығы оянды. 

«Шұжық жасауға үйрететін арнайы курстар Ақтау қаласынан табылды. Қымбаттау болса да, азаматым қажетті ақшаны та­уып беріп, талабымды қолдады. Үш сатылы оқудан кейін жаңа кәсіпті бастадық. Осыдан 3 жыл бұрын жеке кәсіпкер ретінде тіркеліп, облыс орталығынан шағын ғимаратты жалға алдық. Шұжық өнімдері мен жартылай фабрикаттар шығаратын цехқа қажетті құрал-жабдықтарды алуға «Даму» кәсіпкерлікті дамыту қорынан жеңілдетілген несие алдым. «Таудай бол» брендімен өнім шығару ісі осылай басталды», дейді кәсіпкер.

 Уақыт өте келе тапсырыс көбейіп, өндіріс аясын кеңейту қажет болды. Бұл жолы да Жаннұр мемлекет қолдауына арқа сүйегенін айтады. 2021–2025 жылдарға арналған кәсіпкерлікті дамыту ұлттық жобасы мен «Coca Cola белестері» бастамасы аясында жаңа бизнес идеяларды жүзеге асыруға мүмкіндік беретін жеңілдетілген грант ұтып алды. Мемлекет қолдауы тек құрал-жабдық сатып алудан бөлек істі жоспарлауда да серпін берді. 

Өнім танымал болу үшін сапасына сын келмеуі керек. Сондықтан да ол цехқа қажетті шикізатты Жалағаш ауданындағы сенімді фермерлерден ғана сатып алады. Әрбір ет партиясы қатаң тексеруден өтеді. Тұтынушылар сеніміне ие болған «Таудай бол» сауда белгісімен өнді­рілетін шұжық өнімдері мен жартылай фабрикаттар облыс орталығындағы 16 дүкеннің сөресінен орын тепкен. Кәсіпкер алда өнім түрлерін көбейте түсуді жоспарлап отырғанын айтады. Елімізден бөлек сырттан да тұтынушылар табу бағытында ізденіс бар. 

 «Тұмар» шағын өнеркәсіп аймағынан 20 түрлі кондитер өнімін шығаратын жаңа цехын іске қосқан кәсіпкер мемлекет тарапынан көрсетіліп жатқан қолдау шаралары оның ісін ілгерілетуге дем беріп отырғанын айтады. Бүгінде екі цехта 11 адам тұрақты жұмыспен қамтылса, алда өндірісті кеңейтіп, тағы бір сауда нүктесін ашу жоспарда бар. Талабы биік «Таудай бол» бұл үдеден көрінетініне сенім мол.

«Ісіңе адал болып, алған бетіңнен таймасаң, табысқа жетесің. Мемлекет әрдайым қолдау жасап, түрлі бизнес идеяны жүзеге асыруға мүмкіндік жасап келеді», дейді кәсіп иесі.   

Қызылорда