Талды ауылының жолын қайта жөндеу жұмысы келесі жылға қалды

Қарқаралы ауданы Талды ауылының жолын қайта жөндеу жұмысы келесі жылға қалды. Жол салу кезінде техникалық талап сақталмағандықтан, құрылыс тоқтатылды.

Жоба бойынша екі қабат асфальт жабыны төселуі тиіс еді. Негізі бұл тасжол 5 жыл бұрын жөнделген. Бірақ 1 жыл өтпей жатып сапасыз жолдың шұрық-тесігі шықты. Кейін қайта жөндеу туралы шешім қабылданды. «Алайда бұл жолдың жыры бітер емес», - дейді ауылдықтар.

45 шақырым болатын «Қарқаралы-Талды» жолы 5 жыл бұрын 800 млн теңгеге жөнделді. Алайда жыл өтпей, асфальт жарамсыз болып қалды. «Жол активтері сапасының ұлттық орталығы» сараптама жүргізіп, мердігердің техникалық талапты сақтамағанын анықтады. Жергілікті мердігері сотқа берді. Тараптар соттасып жүргенде, тұрғындар жол азабын тартуда.

Екі жыл бұрын қайтадан жобалық-сметалық құжат  жасалып, жол екінші мәрте жөнделе бастады. Алайда бұл жолы да  техникалық талап ескерілмей, жергілікті билік жұмысты тоқтатты.

Қарқаралыдан Талды ауылына барар бағыттағы жолдың алғашқы 3 шақырымы көл маңында орналасқан. Бұл жерде ылғал басым болғандықтан асфальты қатты зақымданған. Осыған байланысты бұл жол уаскесіне күрделі жөндеу басталған еді. Алайда жобалық-сметалық құжатқа өзгеріс енгізілуіне байланысты жұмыс тоқтатылды. Енді жаңа жоспар бойынша бұл учаскеге екі қабатты асфальт төсеу жоспарланып отыр.

Абылай  Ысқақов , ТҮКШ Жолаушылар көлігі және автомобиль жолдары бөлімі басшысының м.а:

- Келесі жылда ауа-райы жақсарғанша түзетулерді енгізіп, жұмыстарды бастаймыз деп жоспарлап отырмыз. Облыстағы басшыларымызға ескерттік. Осы мәселе бойынша бюджеттік жоспарлау кезінде қаражат қаралады деген жауап келді.

«Жолдың бұл учаскесі  келесі жылы жөнделеді. Қалған бөлігі кезең-кезеңімен жаңғыртылмақ. Алдағы уақытта жолмен ауыр жүк көліктердің жүруіне шектеу қойылады»,- дейді жергілікті билік өкілдері. Биыл Қарағанды облысында 637 шақырым жол жөнделді, оның 311 шақырымы қала мен аудандық маңыздағы жолдар.

Авторлары: Руслан Нұрланұлы, Сайран Ақамбаев, Аман Хамит