Тасшағыл ауылында амбулатория ғимараты жоқ

Атырау облысындағы Тасшағыл ауылының дәрігерлері әкімдік қызметкерлерімен бір ғимаратта отыр.

Ауылда санитарлық талапқа сай дербес амбулатория жоқ. Арнайы жабдықталған кабинеттер жетіспейді, бөлмелер тар. Сондықтан ауылдықтарды қабылдау кезінде кедергі көп - дейді мамандар.

Бұл – Тасшағыл ауылындағы жалғыз медициналық мекеме. Әкімдік қызметкерлерімен бірлесе, ортақ пайдаланылып отырған нысанның бірінші қабатында дәрігерлер, ал жоғарғы қабатында ауылдық округ әкімдігі орналасқан. Жалпы бір ғимаратта мемлекеттік басқару мен медициналық қызметті жүргізу санитарлық талапқа қаншалықты сай келеді?

Ауыл амбулаториясында 19 маман жұмыс істейді. Ескірген ортақ ғимаратты былтыр жөндеуден өткізген. Дегенмен нысан медициалық талапқа сай емес. Жоғарғы қабатында ауылдық округ әкімдігінің 10-ға жуық қызметкері отыр.

Бейнегүл Таспанова, Тасшағыл дәрігерлік амбулаториясының аға медбикесі:

- Өзімізге арнайы нысан болғанын қалаймыз. Барлығы өзінің ретімен болғаны жақсы ғой. Соған байланысты жаңа амбулатория тезірек болса екен дейміз. Қол жуатын жерлері жоқ, бөлме жетіспейді. Бір-бірімізбен бірігіп отырған жерлер бар. Бәрінеде кең бөлме керек.

Облыстық құрылыс басқармасындағылардың мәліметінше, келесі жылы дәрігерлер жаңа ғимаратқа көшеді. Амбулаторияның жобасы дайын. Мердігер мекеме де анықтаған.

Дархан Тілепберген, облыстық Құрылыс басқармасының бөлім басшысы:

- Тендерлік рәсімдер жүргізіліп, мердігер мекеме анықталды. Құрылыс орны, жері барлығы дайын. 25 адамға арналған бір күндік амбулатория. 2026 жылғы бюджеттен толық қаржысы бөлініп, құрылыс жұмыстары 6 айға созылады.

Амбулаторияның құрылысына 600 млн теңге облыстық бюджеттен бөлінеді. Жаңа нысан пайдалануға берілсе, ауыл тұрғындарына сапалы медициналық қызмет көрсетіледі. Жалпы өңірде «Ауылдық денсаулық сақтауды жаңғырту» ұлттық жобасымен 15 медициналық нысан салынып жатыр. Одан бөлек, облыстық денсаулық сақтау басқармасының тапсырысымен жергілікті бюджет қаржысына 12 ғимараттың құрылысы жүруде.

Авторлары: Асланбек Шығыр, Амантай Матенов, Жандос Рахметуллин