Жетісу облысында екі дәрігерлік амбулатория ашылды

Жетісу облысында екі дәрігерлік амбулатория ел игілігіне берілді.

Жайпақ және Қайнар ауылдарындағы медицина нысандары қайтарылған актив есебінен салынды. Енді шекаралы аймақтың үш мыңға жуық тұрғыны кең әрі жаңа ғимаратта ем дом алады.

Бақтыбек Стамбекұлы үш жыл бұрын жүрегіне күрделі операция жасатқан. Сондықтан тұрақты түрде дәрігерлерге қаралып тұрады. Ауыл ақсақалы жаңа амбулаторияға алғаш рет келіп, қан қысымын өлшетті. 

Бақтыбек Стамбекұлы, Жайпақ ауылдық Ақсақалдар кеңесінің төрағасы:

- Іші өте жақсы жасалған. Біріншіден – таза. УЗИ бар. Сонымен қатар жүректі қан қысымын өлшейтін бөлім бар. Барлығы керемет. Жағдай жасалған.

Емдеу мекемесінде әдеттегі кабинеттерден бөлек, күндізгі стационар, физиологиялық ем алу және оңалту бөлмелері бар. Сонымен қатар жұқпалы ауру жұқтырғандарға арналған пункт қарастырылып, бұрын-соңды болмаған құралдармен жабдықталды.

Сая Мазабаева, дәрігерлік амбулатория меңгерушісі:

- Кальпаскоп - біздің ауылға таңсық. Өйткені әйелдеріміз қалада ғана кальпаскоппен тексеріліп, қаралатын еді. Қазір өзімізде кальпаскоп бар. Сонымен қатар КТГ бар. Бұл жүкті әйелдің ішіндегі баланың жүрегін тыңдайтын өте қымбат апаратурамыз  қолжетімді болып тұр. 

Ерлан Қасымбаев, Алакөл ауданының прокуроры:

- ҚР Президентінің тапсырмасына сәйкес ҚР Прокуратура органдарымен қайтарылған активтер бойынша 14 әлеуметтік нысан салынды. Оның ішінде екеуі Алакөл ауданында. Ол біреуі Қайнар және Жайпақ ауылдарында. Екі дәрігерлік амбулатория бойынша нақты жұмыстар жүргізілді. 24 жылы басталып 25 жылы аяқталды. Прокуратура органдарының бақылауымен құрылыс сапасы қадағаланып отырды.

Алакөл ауданында биыл жергілікті бюджет есебінен және «Ауылдағы денсаулық сақтауды жаңғырту» ұлттық жобасымен 11 медицина мекемесі салынды.

Асхат Қуанышбайұлы, Алакөл аудандық орталық ауруханасының директоры:

- Бес ауылда толығымен бітіп, ФАП пен дәрігерлік амбулаторияны қолдануға алдық. 4 елді мекенде жылдың аяғына дейін бітеді. Одан басқа жергілікті бюджеттен екі ауылда дәрігерлік амбулатория бітіп, сонымен ғимарат мәселесі бүкіл ауданда жабылады. 

Биыл Жетісу облысының ауылдарында 43 дәрігерлік амбулатория ашылды. Жыл соңына дейін тағы 16-сы ел игілігіне беріледі.

Авторлары: Шыңғыс Қалиден, Жеңіс Әбдірешов