Ақтөбе облысында 11 дәрігерлік пункт салынды

Ақтөбе облысында биыл қайтарылған активтерден түскен қаражатқа 11 дәрігерлік пункт салынды, деп хабарлайды 24KZ. Солардың бірі Нұра ауылында бой көтерді. Былтыр көктемде елдімекенді түгел су шайып, бірқатар нысан бүлінген еді.

Медбике Ғалиягүл Шәріп дәрігерлік пункттің ашылуын асыға күтіп жүр. Ол тұрғындарды қабылдау жыл бойы үй-үйді аралауға мәжбүр болған. Былтырғы су тасқынынан ескі Нұра елді мекені түгел қирады. Жаңа орынға көшкенде әуелі баспаналар, мектеп және балабақшаларға басымдық берілді. Ал фельдшерлік-акушерлік пункт құрылысы кейінге қалдырылған. 

Ғалиягүл Шәріп, медбике:

- Тұмаудың кезінде өте қиын. Қазіргі таңда тұмау өршіп тұр. Бізді басқа мекемеге кіргізбейді ғой. Мектепке кіргізбейді. Көп мектептің балаларын үйден аралап қараймыз. Мекеменің ашылуын күтіп отырмыз.

Табиғи апаттан кейін жаңа Нұрада 63 үй салынды. Биыл 4 отбасы баспана тұрғызып қоныс аударған. 700-ге жуық тұрғыны бар шалғайдағы елді мекенде бір дәрігер мен үш кіші медициналық қызметкер болуы тиіс. Жаңа ғимаратта олар күніне 40 адамды қабылдай алады.

Жасұлан Сламғалиев, Нұра ауылының тұрғыны:

- Әзірге аудан орталығына барып көмек алып жатырмыз. Баламыз да, өзіміз де ашылуын тағатсыздана күтіп отырмыз. Біздер қазір, өздеріңіз көргеніңіздей, жол мәселесі. Барып келудің өзі, мысалы, уақытты талап етеді.

Биыл Ақтөбе облысында 11 медициналық мекеме салынды. Құрылысқа қайтарылған активтер қаражаты есебінен 1,7 млрд теңге бөлінді. Дәрігерлік пункттер «Ауылда денсаулық сақтауды жаңғырту» ұлттық жобасы аясында шалғай елді мекендерде тұрғызылды. 

Аслан Жарасбаев, Құрылыс, сәулет және қала құрылысы басқармасы басшысының орынбасары:

- 11 медициналық пункттің жетеуі қабылданды және осы алдағы аптада екеуін қабылдаймыз. Жылдың соңында екеуін қабылдап, жалпы 11 нысанды толығымен аяқтаймыз.

Фельдшерлік-акушерлік пункттің ашылуын төрт бірдей елді мекен халқы күтіп отыр. Нұра ауылынан бөлек, бұл медициналық мекеме Белшер, Дүкен, Мамыр елді мекені тұрғындарына да қызмет көрсетеді.

Авторлары: Мансұр Есқожин, Боблатбек Молдағалиев, Айбек Даутов