Ақтөбе облысында 29 медициналық мекеме салынды

Ақтөбе облысында кейінгі үш жылда 29 медициналық мекеме қолданысқа берілді. Олар «Ауылда денсаулық сақтауды жаңғырту» ұлттық жобасы аясында салынған. 

Әлеуметтік нысандардың дені ел қазынасына қайтарылған қаражат есебінен тұрғызылды. Нәтижесінде мыңдаған тұрғын сапалы медициналық қызметке қол жеткізді.

Мұхтар Көбейсінов: «Жаңа медициналық мекемеге бірінші рет келіп отырмыз», - дейді. Сегіз айлық нәрестесінің қызуы көтеріліп, мазасы қашқан соң дәрігердің қабылдауына жазылған. Маржанбұлақ ауылы тұрғыны қайтарылған активтердің қайыры тиді дейді. Әсіресе кішкентай пациенттердің кезек күтіп отырып қалмайтынына риза.

Мұхтар Көбейсінов, Маржанбұлақ ауылының тұрғыны:

- Мамандар жеткілікті болды. Алайда кезек көп болатын еді. Енді кішкентай ғой. Қазір енді жаңа амбулатория ашылды. Іші жақсы екен. Бүгін бірінші рет келіп тұрмыз. Кең, кабинеттердің барлығы жабдықталған. Жедел жәрдем де уақытында келеді шақырсақ. Жаңадан көлік беріп қойыпты. Жақсы.

Дәрігерлік амбулатория 5500 адамға қызмет етіп отыр. Маржанбұлақ ауылынан бөлек іргедегі үш елді мекен халқы да қаралады. Медицина мекемесінде үш жалпы тәжірибелі дәрігер мен сегіз медбике жұмыс істейді. Қажетті барлық құрал-жабдықпен жеткілікті қамтылған ауылдық амбулатория күніне 45 науқасты қабылдауға есептелген.

Светлана Ағзамова, Маржанбұлақ дәрігерлік амбулаториясының аға дәрігері:

- Жаңадан ашылып жатқан ғимараттарда ЛФК кабинет бар екен. ЛФК, физкабинет екіден бір амбулаторияларда кездесе бермейтін жағдай. Инсульт алған науқастарға, реабилитациялық емге қажетті құралдардың барлығы бар екен мында. Төрт орынды күндізге стационар қабылдап жатырмыз. Айына 20 науқас қабылдаймыз. 

Бұл амбулатория ел Президентінің тапсырмасымен басталған «Ауылдық денсаулық сақтау саласын жаңғырту» ұлттық жобасы аясында салынды. Жалпы бұл бағдарлама негізінде Ақтөбе облысындағы 29 ауылды қамту көзделген. Басты міндет – шалғайдағы елді мекендерді бастапқы медициналық көмек ұйымдарымен қамтамасыз ету.

Серік Тәжіғұлов, Облыстық Денсаулық сақтау басқармасы басшысының орынбасары:

- Алғашқы медициналық-санитарлық көмек көрсететін 29 нысанның құрылысына 5,3 млрд теңге қаржы бөлінді. Қазіргі таңда дәрігерлік, фельдшерлік пункттердің барлығы жұмыс істеп тұр. Ал Хромтау, Мұғалжар және Шалқар ауданаралық ауруханаларына қосымша ғимараттар салу үшін 5,3 млрд теңге қарастырылған. 

Ауданаралық ауруханаларды кеңейтуге бағытталған кешенді жұмыстың жобалық сметалық құжаттары әзір. Биыл құрылыс жұмыстары басталады. 

Авторлары: Мансұр Есқожин, Айнадин Молдабеков, Айбек Даутов