Тәулігіне 300 ден астам автобус: жаңа газ құю станциясы Алматыдағы жүктемені қалай азайтады

Алматыда жаңа "Көк-Қайнар" автомобиль газ толтыру компрессорлық станциясы (АГТКС) ашылды, ол ең алдымен қаладағы қоғамдық көлікке қызмет көрсетуге арналған.

Ондағы жабдықтың өнімділігі сағатына 4 400 м³ дейінгі табиғи газдықұрайды, яғни толық қуатында жұмыс істегенде тәулігіне 100 мың м³ астам газды сығымдай алады. Станция аумағында 16 газ құю бекеті бар, ал есептік өткізу қабілеті бір тәулікте 300 көліктен асады.

Станция шамамен бір гектар аумақты алып жатыр, ол ірі габаритті көліктердің қозғалысын ескере отырып жобаланған. Автобустар станция аумағына кедергісіз кіріп, күту аймағына тұрады, газ толтырып, бекеттер маңында кептеліс тудырмай шығып кете алады.

Жобаны Almaty Building & Co компаниясы толықтай жеке инвестициялар есебінен іске асырған. Бұл бағытты дамытуға қазақстандық кәсіпкер Мәди Әбілғазин инвестиция салып отыр.

"Көк-Қайнар" станциясы Almaty Building & Co биыл жүзеге асырған екінші жоба болып отыр. Бұған дейін компания Ақтөбеде АГТКС іске қосқан еді. Нысан QazaqGaz Onimderi франшизасы бойынша жұмыс істейді.

Компанияның мәліметінше, QazaqGaz Қазақстанда табиғи газды көлік отыны ретінде пайдалануға қажетті инфрақұрылымды дамытуға және оны көлік секторында қолдану аясын кеңейтуге ықпал етіп келеді.

Неліктен Алматыға қосымша АГТКС керек?

Газ-моторлы отынмен жүретін қоғамдық көлікті дамыту үшін автобус паркін жаңарту ғана емес, газ құю инфрақұрылымының жеткілікті желісі де қажет.

Қазір Алматыда бірнеше АГТКС жұмыс істеп тұр. Жекелеген станцияларға түсетін жүктеме артқан сәтте кезек пайда болуы мүмкін. Мұндай кездеавтобус парктері газ құю үшін артық жол жүріп, көлік маршруттан тыс жерде уақыт жоғалтады.

Almaty Building & Co компаниясының техникалық серіктесі Абай Бекетовтің сөзінше, газ құю инфрақұрылымының жалпы қуаты ғана емес, оның қала аумағында қаншалықты тиімді орналасқаны да маңызды.

"Бұл инфрақұрылым ең алдымен қоғамдық көлікке арналған, дегенмен нысан бастапқыдан-ақ көліктің басқа санаттарына да қызмет көрсету мүмкіндігі ескеріліп жобаланды. Сұраныс туындаған жағдайда мұнда коммуналдық техника мен транзиттік жүк көліктері де газ толтыра алады", - деді Абай Бекетов.

Жаңа станция Алматының батыс бөлігіндегі Көк-Қайнар шағынауданында орналасқан және негізінен осы бағытта қатынайтын көліктерге қызмет көрсетуге арналған. Мұның арқасында автобустарды алыстағы газ құю станцияларына жіберу қажеттілігі азайып, қала инфрақұрылымына түсетін жүктеме де біркелкі болады.

Басқа АГТКС-терге түсетін жүктеме артқан жағдайда, "Көк-Қайнар"қосымша көлік ағынын қабылдай алады, осылайша қаладағы газ-моторлы отын құю жүйесінің қосымша резерві қызметін де атқарады.

Дизельдің орнына газды пайдалану: экологиялық әсері

Almaty Building & Co компаниясы АГТКС желісін дамыту қала көліктерінің сығымдалған табиғи газды (СТГ) кеңінен қолдануы үшін қажетті инфрақұрылымды қалыптастыратынына сенімді.

Табиғи газды көлік отыны ретінде пайдалану дәстүрлі дизель және бензинмен жүретін көліктермен салыстырғанда бірқатар ластаушы заттың ауаға тарауын азайтуға септігін тигізеді. Жоба өкілдерінің ақпаратынша, экологиялық ахуал қаладағы ең өзекті мәселелердің бірі болып отырған Алматы үшін мұндай инфрақұрылымды дамыту көлік жүйесін жаңғыртудың нақты бағыттарының біріне айналуы мүмкін.

Бұл ретте станцияның мүмкіндігі автобустармен ғана шектелмейді. Оның инфрақұрылымы табиғи газбен жүретін коммуналдық техника мен транзиттік жүк көліктеріне де қызмет көрсетуге мүмкіндік береді. Мұндай автопаркартқан сайын, станцияның қуатын да кеңірек пайдалануға болады.

Нысанда өнеркәсіптік қауіпсіздікке айрықша мән берілген. Станцияда газдың ықтимал шығуын бақылайтын көпдеңгейлі автоматты жүйе орнатылған. Жүйе белгі бергенде жабдық автоматты түрде тоқтап, мәжбүрлі желдету қосылады. Станция қызметкерлері өнеркәсіптегі қауіпсіздік бойынша міндетті түрде оқытылып, арнайы даярлықтан өтеді.

Осылайша, АГТКС жекелеген газ құю нүктесі ғана емес, Алматыда газ-моторлы отынды пайдалану аясын одан әрі кеңейтуге қажетті инфрақұрылымның бір бөлігіне айналып отыр.

Алматыдан өңірлерге: 20 жаңа станция салу жоспары

"Көк-Қайнар" станциясын Almaty Building & Co газ-моторлы отын инфрақұрылымын дамытуға бағытталған ауқымды бағдарламаның бір бөлігі ретінде қарастырады.

Компания осындай жобаларды Алматыда, Қазақстанның өзге де өңірлерінде және негізгі көлік дәліздерінің бойында жүзеге асыруды жоспарлап отыр. Дамудың жеке бағыты ретінде "Батыс Еуропа-Батыс Қытай" халықаралық транзит дәлізі бойында газ құю инфрақұрылымын құру көзделген. Бұл газ-моторлы отынды қалалық көлікте ғана емес, қалааралық және транзиттік жүк тасымалында да кеңінен пайдалануға мүмкіндік береді.

"Көк-Қайнар" автомобиль газ толтыру компрессорлық станциясының ашылуы - Алматы үшін елеулі оқиға, ал біз үшін бұл дамудың келесі кезеңінің басталуын білдіреді. Біз газ құю инфрақұрылымын жүйелі бағыт ретінде қарастырып, Қазақстанның әртүрлі өңірінде 20-дан астам АГТКС салуды жоспарлап отырмыз", - Almaty Building & Co компаниясының бас директоры Болат Ыбрашев.

Желіні кеңейту көлік саласының нақты қажеттіліктерін ескере отырып жоспарланады - станциялар ірі қалаларда, автобус және коммуналдық парктер шоғырланған жерлерде, сондай-ақ негізгі көлік бағыттарында бой көтереді. Компания өкілдерінің айтуынша, мұндай тәсіл жаңа нысандарды нақты сұраныс бар жерлерде салып, Қазақстандағы газ-моторлы отын инфрақұрылымын біртіндеп кеңейтуге мүмкіндік береді.

Бізді Google-дың негізгі дереккөздер тізіміне қосыңыз

Қосу