Таулы аймақтардың мәселесін ЕЭК аясында бөлек қарастыру қажет сарапшы

АСТАНА, 29 мамыр – Sputnik. Қырғызстан халықаралық тау институты директорының орынбасары Уран Ахметов Sputnik Қазақстанға берген сұхбатында таулы аймақтардың мәселесін Еуразиялық экономикалық комиссия (ЕЭК) аясында бөлек қарастыру қажет екенін айтты.

"Құрлықтың 27%-ын таулы аймақтар құрайды. Әлемде таулы аймақтарда 1,2 миллиардтан астам халық тұрады. Яғни таулар мен тау экожүйелерінің әл-ауқатына қатысты кез келген мәселе ғаламшарымыздың әрбір тұрғынына тікелей қатысты", - деді Ахметов.

Сарапшының пікірінше, егер осы мәселелерге жеткілікті көңіл бөлінсе, бұл болашақта ЕАЭО елдері халқының әл-ауқатының артуына ықпал етеді. Оның айтуынша, таулы және шалғай аймақтардың тұрғындары инфрақұрылымға, мемлекеттік қызметтерге, энергетикалық ресурстар мен заманауи технологияларға қол жеткізуде қиындықтарға тап болып отыр.

Институт ЕЭК-тің жалпы күн тәртібіне таулы аймақтарды дамыту мәселесін енгізуді, сондай-ақ шалғай аймақтарда жасанды интеллектіні енгізу үшін TinyML технологияларын дамытуды ұсынды.