Темірлан Анарбеков Чемпиондар лигасының үздік ойыншылары қатарына енді

Алматының «Қайрат» командасының және Қазақстан құрамасының қақпашысы Темірлан Анарбеков Чемпиондар лигасы матчында ең жоғары баға алған футболшылар қатарына кірді, деп хабарлайды Egemen.kz.

Sofascore дерегінше, Анарбеков Чемпиондар лигасының жалпы кезеңінің үшінші турындағы Кипрдің «Пафос» клубына қарсы өткен ойында «10» деген ең жоғары бағаға ие болды.

Бұл матч Темірлан үшін жақында алған жақ сүйегі жарақатынан кейінгі алғашқы ойын еді.

Екінші таймда ол нағыз қаһарманға айналды – екі бірдей суперсейв жасап, алматылықтардың қақпасын аман сақтап қалды.

Қазақстандық қақпашы Фермин Лопес («Барселона»), Килиан Мбаппе («Реал»), Фил Фоден («Манчестер Сити») сынды жұлдыздармен бірге ең жоғары «10» бағасын алған ойыншылар тізіміне енді.

Айта кетейік, «Қайраттың» Чемпиондар лигасындағы келесі матчы 9 желтоқсан күні Астанада өтеді. Клуб «Астана Арена» стадионында гректің «Олимпиакос» командасымен кездеседі. Билеттердің сатылымы басталған.