Tesla автокөлік модельдерін қысқартып, роботтар мен ЖИ ға бет бұрды

Tesla электромобильден (EV) ЖИ мен робототехникаға көбірек назар аудара бастаған тұста, компанияның жылдық табысы алғаш рет құлдырағаны белгілі болды. BBC News деректеріне сүйенген Aikyn.kz Tesla-ның автокөлік модельдерін қысқартып, роботтар мен ЖИ бағытын күшейту себебін баяндайды.

Tesla-ның айтуынша, компания жасанды интеллект пен робототехникаға бет бұрған кезеңде жылдық кіріс көлемі алғаш рет төмендеді. Электромобиль өндіруші компания 2025 жылы жалпы табысы 3%-ға төмендегенін айтты. Ал жыл соңындағы соңғы үш айда пайда мөлшері 61%-ға азайған. 

Әлемдегі ең бай кәсіпкерлердің бірі Илон Маск басқаратын компания Model S және Model X көліктерін шығаруды тоқтатуды жоспарлап отыр. Енді осы модельдер өндірілген Калифорниядағы зауыт Tesla-ның адамтектес роботтары Optimus желісін шығаруға пайдаланылмақ.

Қаңтар айында Қытайдың BYD компаниясы Tesla-ны басып озып, әлемдегі ең ірі EV өндіруші атанды. Ал Масктің АҚШ-та да, шетелде де саясатқа араласуы көпшілік арасында даулы тақырыпқа айналды.

Tesla сондай-ақ Масктың xAI атты жасанды интеллект жобасына $2 млрд (шамамен £1,45 млрд) инвестиция салғанын мәлімдеді. Tesla-ның xAI-дің соңғы қаржыландыру кезеңіне қатысуы туралы Маск: «Көп инвестор бізден осыны сұрады. «xAI-ға инвестиция салыңдар» деп айтылған соң, біз негізінен акционерлер талап еткенді жасаймыз», – деді.

Фото profit.pakistantoday.com.pk сайтынан алынды.

Бұл қадам Tesla акционерлері xAI-ға инвестиция салу туралы ұсынысқа дауыс бергеннен кейін жасалып отыр. Ол дауыс беруде бұл идеяны қолдамағандар мен қалыс қалғандардың саны қолдағандардан көп болған.

Өткен жылы инвесторлар әлемдегі ең бай адам саналатын Маскке рекордтық сыйақы пакетін беруді басым дауыспен қолдаған еді. Оның құны $1 трлн-ға жуық. Бұл төлемді алу үшін Маск алдағы 10 жылда компанияның нарықтық құнын күрт өсіруі қажет. Компания шығындарын да айтарлықтай арттырмақ. Болжам бойынша, бұл шығын шамамен $20 млрд болады.

Маск сарапшылармен қоңырау кезінде: «Келесі жылы капиталдық шығын өте үлкен болады. Біз болашағы жарық үлкен мақсаттар үшін ірі инвестициялар жасап жатырмыз» – деді. Tesla акциялары сауда уақыты аяқталғаннан кейінгі сессияда шамамен 2%-ға өсті.

Бұл жаңалық Масктің саясатқа белсенді араласуынан кейін жарияланып отыр. Соның ішінде АҚШ президенті Дональд Трамп әкімшілігінде шығынды қысқартуға байланысты беделді рөл атқарғаны да аталады.

Масктің саясатқа араласуы Tesla тұтынушыларының бір бөлігінің көңілін суытты. Соның салдарынан әлемнің әр жерінде компанияның дилерлік орталықтары маңында наразылық акциялары өтті. Tesla-ның электромобильден басқа бағыттарға бет бұруы да осы кезеңге сәйкес келді. Дәл сол уақытта Трамп қазба отынға жатпайтын көліктерге берілетін кейбір мемлекеттік субсидияларды тоқтатты.

Бір кездері әлемдегі ең табысты автокомпаниялардың бірі болған Tesla соңғы уақытта роботакси бағытын да күшейтіп келеді. Сарапшылардың айтуынша, Tesla-ның жаңа бизнеске көшуі электромобиль желісінің «ескіре бастағанымен» де байланысты.

Edmunds компаниясының Insights бөлімінің жетекшісі Джессика Колдуэлл: «Model S пен Model X біраз уақыттан бері Tesla үшін аз көлемде сатылатын көліктердің қатарында болды» – деді. Оның айтуынша, компания үшін бұл қадам орынды: Model S пен Model X-ті тоқтатып, Model 3 пен Model Y сияқты көп сатылатын үлгілерге және басқа да кеңею жоспарларына назар аудару қажет.