The Lancet: Еуропада аптап ыстыққа байланысты өлім жітім күрт артты

Зерттеу деректеріне сәйкес, Еуропада зерттелген аймақтардың 99,6%-ында 2015–2024 жылдар аралығындағы аптап ыстыққа байланысты өлім саны 1991–2000 жылдармен салыстырғанда жоғары болған.

Орташа өсім жыл сайын әрбір миллион тұрғынға шаққанда шамамен 52 қосымша өлім жағдайын құраған. Ал Испания, Италия, Грекия және Болгарияның кейбір өңірлерінде бұл көрсеткіш миллион адамға шаққанда 120-дан асып кеткен.

Зерттеу авторлары Еуропада экстремалды ыстық туралы ескерту жарияланатын күндер саны 1990-жылдардың басымен салыстырғанда орта есеппен 318%-ға артқанын атап өтті.

Ең жоғары өсім Батыс Еуропада, соның ішінде Германияда тіркелген. Онда көрсеткіш шамамен 450%-ға көбейген.

Ғалымдар бұл өзгерістерді климаттың өзгеруімен байланыстырады. Олардың айтуынша, жаһандық жылыну тек өлім-жітімге ғана емес, халықтың жалпы денсаулық жағдайына да әсер етеді.

Мысалы, көктемнің ерте келуіне байланысты аллергенді өсімдіктердің гүлдеу маусымы 1–2 аптаға ертерек басталады. Бұл аллергияға бейім адамдарда реакциялардың да ерте басталуына себеп болады.

Сонымен қатар Еуропада тропикалық жұқпалы аурулардың таралу қаупі артып келеді. Зерттеушілер маса арқылы таралатын инфекциялар, соның ішінде денге вирусының таралу аймағы кеңейіп жатқанын айтады. Бағалау бойынша, жұқтыру қаупі шамамен 300%-ға өскен.

Бұған дейін Тынық мұхитының экваторлық бөлігіндегі су бетінің жылынуына себеп болатын Эль-Ниньо құбылысы 2026 жылдың соңына қарай қайта дамуы мүмкін екені хабарланған еді. Сарапшылар мұның салдарынан әлемде су тасқыны, құрғақшылық және рекордтық температуралар болуы мүмкін екенін ескерткен.

Айта кетейік, бұған дейін пандемиядан кейін Солтүстік Кореяда Оңтүстік Корея контентін көргені үшін өлім жазасы көбейгенін жаздық.