Алматыда аптап ыстыққа байланысты жедел жәрдем шақыртуы көбейген

Ең жиі тіркелген себептердің қатарында артериялық қан қысымының көтерілуі мен жүрек-қан тамырлары аурулары, соның ішінде жүректің ишемиялық ауруы және жедел миокард инфаркті бар. Сонымен қатар, ми қан айналымының жедел бұзылысына ұшыраған науқастар шұғыл түрде қалалық стационарларға жеткізілді.

Алматыдағы емханалар созылмалы аурулары бар пациенттерді диспансерлік бақылауды жалғастырып, оларды қажетті дәрі-дәрмекпен қамтамасыз етіп, денсаулық жағдайына тұрақты мониторинг жүргізіп отыр.

Дәрігерлер тұрғындарға сағат 11:00-ден 17:00-ге дейін күн астында ұзақ жүрмеуге, жеткілікті мөлшерде су ішуге, жеңіл киім мен бас киім киюге кеңес береді. Егер денсаулық жағдайы нашарласа, дереу медициналық көмекке жүгіну қажет.

Айта кетейік, биыл жазда Еуропадағы аптап ыстық салдарынан 10 мыңнан астам адам қайтыс болды. Мұндай деректі Еуропалық өлім-жітімді мониторингтеу бағдарламасы EuroMOMO жариялады.