TikTok та жарияланған бейнежазба Атырауда парақорлық ісіне себеп болды.

2023 жылы жазда қала тұрғыны Toyota Siena көлігін жүргізіп келе жатып, әуежайға баратын жолда қарсы бағытқа шығып кеткен. Достары бұл сәтті телефонға түсіріп алған.

2025 жылдың 15 желтоқсанында ол бейнені TikTok-қа жүктеп, ролик әлеуметтік желілерде тарай бастады. Видео патрульдік полицияның қызметтік чатына да жеткен. Бөлім командирі жүргізушіні анықтауды тапсырды.

Полицей бейнеден танысының баласын танып, оның ата-анасына барған. Кейін жігітті полиция басқармасына алып келген.

Жүргізушінің айтуынша, басшылықтың тапсырмасымен оны камераға түсіріп, жол ережесін бұзғанын мойындап, кешірім сұрауы керек болған. Әкімшілік жауапкершілік мерзімі өтіп кеткендіктен, іс осымен аяқталуы тиіс еді. Бірақ оған жүргізуші куәлігінен айырылуы мүмкін екенін айтып, 100 мың теңге беруді талап еткен. Бір апта ішінде ақша әкелуді тапсырған. Кейін қайта хабарласып, туыстарына да қысым көрсеткен.

Осыдан соң жүргізуші Ұлттық қауіпсіздік комитетінің облыстық департаментіне арызданған. Кейін полицейдің нұсқауымен ол Kaspi қосымшасы арқылы 90 мың теңге аударған.

Сотта айыпталушы кінәсін мойындап, өкініш білдірді.

Сот оны ҚР Қылмыстық кодексінің 366-бабының 2-бөлігі («Пара алу») бойынша кінәлі деп таныды. Арнайы «полиция сержанты» атағынан айырылып, мемлекеттік қызметте өмір бойы жұмыс істеуге тыйым салынды.

Сонымен қатар 2 миллион 700 мың теңге айыппұл салынды, бұл алынған параның 30 еселенген мөлшері. Қамауда және үйқамақта болған уақыт ескеріліп, соңғы сома 2 миллион 388 мың 600 теңге болып белгіленді. Ал жүргізушіден алынған 90 мың теңге қайтарылды.

Үкім әлі заңды күшіне енген жоқ.

Анастасия ШЕРСТЯНКИНА

Бүгін, 11:31