Тоқаев 2027 жылдан бастап бизнеске тексеру жүргізуге мораторий енгізуді талқылауды ұсынды

Президент Қасым-Жомарт Тоқаев 2027 жылғы 1 қаңтардан бастап шағын және микробизнесті тексеруге үш жылдық мораторий енгізуді талқылауды ұсынды. Мемлекет басшысы мұндай бастаманы Қазақстан халқына Жолдауында көтерді, деп хабарлайды Tengrinews.kz тілшісі.

"Құрылтай депутаттарына Үкіметпен бірлесе отырып, алдыңғы мораторийдің барлық оң және теріс тұстарын ескере келе, 2027 жылғы 1 қаңтардан бастап тағы үш жылдық мораторий енгізудің орындылығын талқылауды ұсынамын", - деді Президент.

Тоқаев шағын және орта бизнестің ЖІӨ-дегі үлесі 40 пайызға жеткенін, ал негізгі капиталға салынған инвестициялардағы үлесі 70 пайызға жуықтағанын атап өтті. Бұл ретте шағын бизнес кәсіпкерлерінің үштен бірінен астамы сауда саласында жұмыс істейді.

Президент аталған секторды әртараптандыруға шақырып, кәсіпорындарды ұзақ мерзімді қаржыландыру мен технологиялық жаңғыртуды қарастыратын орта бизнесті дамыту жоспарын әзірлеуді тапсырды.

Сондай-ақ, Мемлекет басшысы шағын және орта бизнестің мемлекеттік және квазимемлекеттік компаниялардың сатып алуларына қатысуын жеңілдетуді, сатып алудың бір бөлігін осындай кәсіпорындар үшін резервте сақтауды және жеткізушілерге қойылатын талаптарды жұмсартуды ұсынды.

Тоқаевтың айтуынша, бірінші жартыжылдықта жеке кәсіпкерлер тарапынан жасалған заңбұзушылықтар саны 34 пайызға азайған, алайда айыппұлдар сомасы шамамен 11 пайызға өсіп, жоспардан тыс тексерулер ондаған есе жиілеген.

Сондай-ақ ол шоттарды бұғаттайтын камералдық бақылау мәселесіне тоқталып, бизнеске "кедергі жасамаудың өзі жеткілікті" екенін айтты.

Президент Қасым-Жомарт Тоқаев шағын және орта бизнесті тексеруге үш жылдық мораторийді 2020 жылғы 1 қаңтардан бастап енгізген болатын. Ол мемлекеттік органдар бастамашылық ететін тексерулер мен бару арқылы жүзеге асырылатын профилактикалық бақылауды бірқатар ерекшелікпен шектеді. 2022 жылғы желтоқсанда мораторий 2024 жылғы 1 қаңтарға дейін ұзартылып, кейін аяқталды.

2026 жылғы ақпанда Президент шағын және орта бизнесті тексеру саны 2020 жылғы 70 мыңнан 2025 жылы 92 мыңға дейін өскенін хабарлады. Ол бақылау шараларын медициналық қорларға, жекеменшік мектептер мен әлеуметтік жеңілдіктер беру жүйесіне бағыттауды ұсынды.

Бізді Google-дың негізгі дереккөздер тізіміне қосыңыз