Трамп енгізген тарифтер бойынша сот өтеді

Ертең АҚШ-та Президент Трамптың тарифіне қатысты сот отырысы өтеді.

Американдық кәсіпкерлер және бірнеше штаттың басшылығы Президент енгізген баж салығын заңсыз деп санайды. Сондықтан тарифтердің күшін жоюды талап етіп отыр. Егер сот Трампқа қарсы шешім шығарса, оның сауда бойынша жаһандық саясаты түбегейлі өзгеруге тиіс. Демек, сәуір айында жариялаған тарифтерге де әсер етеді. Яғни Ақ үй әкімшілігі миллиардтаған доллар баж салығын қайтаруға міндетті. Президент Трамптың өзі сотқа келмейтінін мәлімдеді. Десе де, Ақ үй әкімшілігінің жоспары басқа. Президентке 150 күнге 15 пайыз тариф енгізуге мүмкіндік беретін заңды қолданамыз деп отыр.

Дональд Трамп, АҚШ президенті: 

- Бұл ел тарихындағы ең маңызды шешімнің бірі. Тарифтерді қолдануға шектеу қойылса, біз ұлттық қауіпсіздік тұрғысынан қатты зардап шегеміз. Өзге елдер бізге қарсы тариф енгізеді. Жоғарғы сот дұрыс шешім шығармаса, бүкіл әлемге күлкі боламыз. Ал мен билікке келгелі біз байып кеттік. Біздің қор нарығымыз жұма күні рекордтық деңгейге жетті. Мен президент болғалы 48 рет рекордтық деңгейге жетті. Сондай-ақ тарифтерсіз біз өзімізге тиімді сауда келісімін жасай алмас едік.