Трамп не деп уәде берді? Зеленский АҚШ тағы келіссөздің құпиясын ашты

Украина президенті Владимир Зеленский әлеуметтік желіде АҚШ президенті Дональд Трамппен Флорида штатында өткен жексенбілік кездесудің нәтижелері туралы мәлімдеді. Оның айтуынша, келіссөздердің басты тақырыбы – Украина үшін қауіпсіздік кепілдіктері болған, деп хабарлайды Arasha.kz.

Кездесу Трамптың Флоридадағы Мар-а-Лаго резиденциясында өтті.

Зеленскийдің сөзінше, АҚШ Украинаға берілетін қауіпсіздік кепілдіктерін 15 жыл мерзімге ұсынуға дайын әрі оны ұзарту мүмкіндігі қарастырылған.

"АҚШ тарапынан берілетін қауіпсіздік кепілдіктері өте мықты болады. Қазір олар 15 жылға есептелген, ұзарту мүмкіндігі бар. Мен 30-40, тіпті 50 жылға дейін қарастыруды ұсындым. Бұл тарихи шешім болар еді", – деді Украина президенті.

BBC мәліметінше, келіссөздер шамамен үш сағатқа созылған. Тараптар болашақ бейбіт келісімнің шарттарының шамамен 95 пайызы бойынша ортақ мәмілеге келген. Алайда Донбасс мәселесі әлі де шешілмей отыр.

Трамп бұл мәселені "ең маңызды түйін" деп атаса, Зеленский Украина ұстанымының айқын екенін және оның Ресей позициясынан түбегейлі өзгеше екенін атап өтті.

Келесі кезеңде Украина, АҚШ және Еуропа елдерінің ұлттық қауіпсіздік жөніндегі кеңесшілерінің кездесуі өтеді. Осыдан кейін Еуропа көшбасшылары мен Украина қатысатын жиынға арналған құжаттар әзірленбек. Негізгі мақсат – қаңтар айында Трамп пен еуропалық лидерлермен өтетін келіссөздерге қажетті шарттарды келісу.

Зеленский сондай-ақ 20 тармақтан тұратын бейбіт жоспар бойынша референдум өткізу мен Ресейден репарация алу мәселесін көтерді.

"Украина халқы бұл бейбіт келісімді қабылдап, оны қолдауы өте маңызды. Репарациялар елді қалпына келтіруге көмектеседі. Алғашқы 100 миллиард долларды алдағы екі жылда транштармен аламыз. Егер соғыс тоқтаса – қаржы қалпына келтіруге жұмсалады, ал қауіп төнсе – қорғанысқа бағытталады", – деді ол.

Алайда Зеленскийдің айтуынша, референдум өткізу үшін кемінде 60 күнге атысты тоқтату қажет. Бұл талапқа Ресей әзірге келіспей отыр.