Трамп Украинаны қалпына келтіруге арналған 800 млрд долларлық келісімге қол қоюдан қашқақтап жүр

Трамп пен Зеленскийдің Давостағы кездесуі өтпейтін болды, Украинаны қайта қалпына келтіру туралы 800 миллиард долларлық келісімге қол қойылмады, деп хабарлайды Arasha.kz.

Украина делегациясындағы дереккөз Axios басылымына Дүниежүзілік экономикалық форум аясында құжатқа қол қою рәсімі өтпейтінін мәлімдеді. Бастапқыда екі мемлекет басшысы соғыстан кейінгі қайта құру бойынша ауқымды келісім жасасу үшін кездеседі деп жоспарланған болатын, алайда келіссөздер тоқтатылды.

Америкалық тараптың өкілі құжатқа қол қоюдың нақты мерзімі ешқашан белгіленбегенін атап өтті. Оның айтуынша, құжат әлі де қосымша пысықтауды қажет етеді. Сонымен қатар, ол Трамптың Зеленскиймен және бірқатар еуропалық лидерлермен форум аясында кездесу мүмкіндігін жоққа шығармады, бірақ мұндай келіссөздерден үлкен нәтиже күтудің қажеті жоқтығын ескертті.

Бұған дейін Владимир Зеленский Киевте қалу туралы шешімін энергетикалық және жылу инфрақұрылымын қалпына келтіру мәселелері жөніндегі кеңеске қатысу қажеттілігімен түсіндірген болатын. Елдің бірқатар аймағы Ресейдің соңғы шабуылынан зардап шеккен еді.