Түнгі театр тылсымы

Театрдың 92-маусымын қоры­тын­дылаған айтулы жоба өнерді тек сахнадан ғана емес, оның ішкі бол­мысымен бірге танытуды мақсат етті. Театрға келген әрбір қонақ өзін жай ғана көрермен емес, шығармашылық ұжымның бір күндік серігі ретінде сезінді.

Жобаның екінші күні театр ішінде жалғасты. Бес жүзден астам адам ғасыр­лық тарихты бойына жинаған қасиетті өнер орда­сының ішкі кеңістігін аралап, тарихи залдарды, репе­тиция бөлмелерін, гримдеу орындарын, сахна сыртындағы қызу тір­шілікті өз көзімен көрді. Әдет­те көрермен назарына ұсынылмайтын бұл кеңіс­тік­тер театр өнерінің қандай қажырлы еңбекпен дүниеге келетінін айқын аңғартты.

Сахна сыртында бәрі өзгеше. Бір бұрышта әнші дауысын баптап жатса, енді бір жерде балет әртістері қимылдарын қайталайды. Музыканттар аспап үнін үйлестіріп, жарық қоюшы мен декорация жасаушы­­лар әр қойылымның мінсіз шы­ғуына атсалысады. Осын­дай сәттерді тама­ша­ла­ған көрермен театрдың әр спектаклі жүздеген адамның ортақ еңбегінен туатын тұтас өнер туындысы екенін терең сезінді.

Кештің шырайын театр декорациялары арасында ұйымдастырылған камералық концерт аша түсті. Сахналық кеңістіктің өзінде өткен музыкалық кеш көрерменге академиялық өнерді бұрынғыдан әлде­қай­да жақын қабылдауға мүмкіндік берді. Бұл жолы өнер мен көрерменнің арасын бөліп тұратын дәстүрлі шекара жойылып, музыка барынша табиғи, барынша шынайы естілді.

Екі күндік мәдени жо­ба­ға театрдың жетекші солис­тері, жас орындаушылар, симфониялық оркестр мен хор құрамын қоса алғанда екі жүзден астам өнерпаз қатысты. Олар кәсіби шебер­­лік­терін ғана емес, театрға деген адалдық пен шығар­машылық жауап­кер­ші­ліктің қандай болатынын да көрсетті.

Бүгінде театр жаңа көрер­менді тәрбиелеудің түр­лі жолдарын іздеп келеді. «Опера түні» – сол ізденістің жарқын жемісі. Ашық аспан астындағы концерттер, сахна сыртындағы экскурсиялар, камералық музыкалық кештер классикалық өнердің тек таңдаулыларға ғана емес, барша жұртқа ортақ рухани қазына екенін тағы бір мәрте дәлелдеді.

Театр шамдары сөн­­генімен, өнердің сәу­лесі өшпейді. «Опера түні» осы ақиқатты тағы бір мәр­те ұқтырды. Өйткені театр – қойылым көрсе­тетін орын ғана емес, уақыт­пен бірге өмір сүретін, дәстүрді жаңашылдықпен сабақтастыратын, адам жанына сұлулық пен ізгілік нәрін құятын киелі мекен. Ал сол мекеннің түнгі тынысын сезінген жанның жүрегінде опера өнеріне деген ықылас бұрынғыдан да арта түсері сөзсіз.