Такси тізгіндеген театр солисті

Өскемен қаласындағы такси қызметін тұтынушылар театр солистінің орындауындағы опералық туындыларды тыңдай алады. Абзал Ес есімді кәсіби маман гастроль мен репетициялардан бос уақытында такси жүргізіп, шығыс қазақстандықтарға ұлы өнерді насихаттап жүр.

Әлемдік классикалық шығармаларды жанды дауыста шырқап жолаушылардың алғысына бөленуде.

Абзал Ес әрі әнші, әрі такси жүргізушісі. Оның орындаушылық шеберлігі кім кімді де бей жай қалдырмайды. Ол көлігіне отырған жолаушыларға классикалық және неополитандық композицияларды орындауды әдетке айналдырған.

Такси жүргізу Абзал үшін хобби іспетті. Оның көрермені – көлігіне мінген жолаушылар. Қала тұрғындары жүргізушінің академиялық вокалдан халықаралық және республикалық деңгейде өткен байқаулардың жүлдегері екенін бірден біле қояды. Өйткені оның репертуарында көптеген классикалық шығармалар бар.

Құралай Кеңесқызы, Өскемен қаласының тұрғыны:

- Абзалмен жол жүру өте керемет. Тамаша осындай әншілермен жол жүру. Мен үшін өте қуанышты.

Бір айта кетерлігі, Абзал музыкадан хабары бар көрермендерінің де көңілін ешқашан қалдырған емес.

Абзал ең алдымен артист. Ол жолға шығарда сахнада өнер көрсететіндей тыңғылықты дайындалады. Даусын баптап, үнемі күтініп жүру керектігін де естен шығармайды.

Ал оның таксиде өнер көрсетуі әлеуметтік жарнама іспетті. Ол сол арқылы қала тұрғындарына театр өнері мен классикалық музыканы насихаттап жүр.

Абзал Ес, ШҚО Оперетта театрының солисі:

- Ең бастапқы мақсат – енді біздің тұрғындарымызды классикаға жақындату. Біздің театрды бәрі білсін деп, осындай жарнама жасағымыз келеді. Сондай-ақ біздің осы жерде қойып жатқан көп, әртүрлі жанрдағы мюзикл, оперетта, опералар қойып жатырмыз. Өте қызықты драмалық, комедиялық, бәрі бар. Соны адамдар көрсін деп осындай ой келді.

Жанат Бисембаев, ҚР мәдениет саласының үздігі:

- Біз бәріміз өнердің құлымыз. Сондықтан мен мұны сол бекзат өнерді насихаттаудың тың тәсілі деп түсінемін.

Өскемендегі оперетта театры еліміздегі ең жас ұжымдардың бірі. Оның құрылғанына небәрі екі-ақ жыл болды. Өнерпаздары қала тұрғындарының көңілінен шығып, жүрегін жаулау үшін осындай қызықты әрі ел ішінде сирек кездесетін тың жобаларды жүзеге асыруда.

Авторлары: Ардақ Айбарұлы, Вячеслав Ветлугин, Дмитрий Пыхтин