Трактор тізгіндеген әйел

Абай облысының тұрғыны Айгүл Сағынаева қырық жасында трактор тізгіндеп, механизатор атанды.

Қазір ол жеке шаруашылықта жұбайына көмек беріп жүр. Еңбекқор келіншек «Жұмысшы мамандықтары жылы» аясында ашылған курсты тәмамдады. Бүгінде ауыр техниканы шебер басқарады.

Айгүл Сағынаева ер мен әйелдің кәсібі деп бөлмеймін дейді. Бастысы, өз ісіңе қызығушылық пен табандылық болуы керек. Өзі ауыр техниканы жүргізу үшін, ауылдағы колледжде арнайы оқып, білімін жетілдірді. Жаз бойы науқанның қызу ортасында жүріп, ер-азаматтармен қатар еңбектенді. Еңбекқорлығы мен іскерлігінің арқасында ауылдағы жастарға үлгі болып отыр.

Айгүл Сағынаева, тракторшы:

- Әкем тракторист болған. Өмір бойы «К-700» жүргізген. Сол техникаға жақын болдым. Бізге қазір сондай маман өте қажет болып тұр. Табу қазір нақты, тұрақты тракторист оңай емес. Мансап орталығына барып содан жұмыссыз ретінде тіркеліп, осындай оқуға түстім. Содан білім алып, практикадан өттім. Жолдасыма болыстым.

Айгүл Алтай өлкесінде туған. Кейін отбасымен Қазақстанға қоныс аударып, Семей қаласында жоғары экономикалық білім алған. Өмірлік серігін жолықтырып, тұрмыс құрған соң ауылға тұрақтайды. Негізгі мамандығы есепші. Қазір жұбайы Ерлан екеуі мал шаруашылығымен айналысады. Туған-туыстары оның еңбекқорлығына, ешқандай жұмыстан қашпай, бар іске белсене араласатын мінезіне сүйсінеді. 

Нұртуған Сағынаев, қайын атасы:

- Келінім жарайды! Барлығын істей алады. Күйеуіне шаруашылықта көмектеседі, сиыр сауады, трактор айдайды, малға қарайды.

Қазір өңірде сұранысқа ие мамандар – дәнекерлеуші, тракторшы, тігіншілер мен шаштараз. Биыл 340 адамды қайта  оқыту жоспарланса, 240-ы қазірдің өзінде кәсіп меңгеріп, жұмыс тапқан. 

Еркебұлан Тұрсын, облыстық еңбек мобильділігі орталығының директоры:

- Сұранысқа ие мамандықтардың барлығының тізбесі жасалған. Жалпы 12 оқу орнында осы оқу жұмыстары жүргізілді. Бүгін бізде 200 ге жуық мекемеден сұраныс түсіп отыр. Оның ішінде өздеріне қажетті мамандарды біздің мәнсап орталығы арқылы сұраныс жасап, жұмыссыз азаматтарды сол компанияларға жұмысқа орналастыратын боламыз. 

Екі баланың анасы бос уақыт дегенді білмейді. Таңның атысынан күннің батысына дейін түрлі кәсіптің басы-қасында жүреді. Үй жағдайында шұжық пен сүт өнімдерін дайындайды. Бау-бақшасын да күтіп баптап,өнім алады. Қазір Айгүл мен жұбайы шаруашылық аясын кеңейтіп, қосымша жұмыс орындарын ашуды көздеп отыр. 

Рүстем Қайратұлы, Медет Өмірханов