Турист қол жүгімен 11 мыңнан астам бриллиантты алып өтпек болған

Германия кеден қызметі Анголадан келген жолаушының қол жүгінен 11 мыңнан астам бриллиантты тапты. Оқиға Франкфурт-на-Майн әуежайында болған, деп хабарлайды Arasha.kz.

DPA агенттігінің кеден және федералдық полицияға сілтеме жасап жазуынша, саяхатшының басты мәселесі — бағалы тастарды кедендік декларацияда көрсетпегені.

«Франкфурт әуежайындағы кеден қызметкерлері жолаушының қол жүгінен 11,2 мыңнан астам бриллиантты анықтады. Олар чемоданның қос түбіне жасырылған. 53 жастағы ер адам Франкфуртқа Анголадан ұшып келген», — делінген агенттік хабарламасында.

Сондай-ақ ер адам бриллианттарға қатысты сертификат ұсына алмаған. Табылған асыл тастардың нақты құны әзірге айтылмайды. Саяхатшы ұсталды.

Бұған дейін Өзбекстанда алғаш рет автокөлік, алкоголь өнімдері және тіпті ауызсуды қолма-қол ақшаға сатып алуға тыйым салынғаны хабарланған еді.