Түркі әлемі: фейкке қарсы ынтымақтастық

Түркі мемлекеттері жалған ақпаратпен күресте ортақ тетік қалыптастыру үшін Анкарада бас қосты.

«Түркі әлемінің бағдары-2040» деп аталған  форумға түркі мемлекеттері ұйымына мүше және бақылаушы елдердің өкілдері қатысты. Қазақстандық делегацияны еліміздің Мәдениет және ақпарат вице-министрі Қанат Ысқақов бастап барды. 

Әлемдік ақпарат айдынында дезинформация қауіпті құралға айналды. Бұл ұлттық қауіпсіздік пен қоғамдық тұрақтылыққа қатер төндіреді. Осылай деген Түркия Президенті Әкімшілігі жанындағы коммуникациялар басқармасының басшысы Бурханеттин Дуран түркі елдерін бірлесіп әрекет етуге шақырды.

Бурханеттин Дуран, Түркияның коммуникациялар басқармасының басшысы:

- Өкінішке орай, түркі мемлекеттерінің халықаралық беделі, ортақ ұлттық сана, өзара ынтымақтастық механизмдері мен аймақтық бірлігі дезинформациялық шабуылға ұшырап отыр. Сондықтан біз түркі халықтарының бір-бірін тереңірек танып, түркі әлемінің халықаралық аренадағы ортақ нарративін қалыптастыру үшін күш біріктіруіміз қажет.

Форумда түркі мемлекеттері ұйымына мүше және бақылаушы елдерден 50-ге жуық сарапшы мен медиа саласының басшылары бас қосты. Олар ақпарат ағынын жайлаған жалған мәліметке қарсы күрестің нақты шешімдері мен тиімді тетіктерін ұсынды.

Өмер Коджаман, ТМҰ Бас хатшысының орынбасары:

- Бұл форумда айтылған идеялар мен ұсыныстар жаңа жобалар мен механизмдер құруға негіз болады. Сонымен қатар түркі елдерінің бірлігі мен бауырластығына қарсы бағытталған кез-келген дезинформациялық әрекетке төтеп бере алатын тетіктер қалыптастыруымыз қажет.

Жиында түркі мемлекеттерінің мәдени кеңістігіндегі ақпараттық теңсіздік мәселесі де көтерілді. Сарапшылар бұл түйткілді өзара ынтымақ арқылы шешуге болатынын айтады.

Сұлтан Раев, халықаралық ТҮРКСОЙ ұйымының бас хатшысы:

- Түркі әлемінде қоғамдық пікір қалыптастыратын медиа ұйымдардың мүмкіндігі бірдей емес. Міне осындай ынтымақтастық арқылы біз осы айырмашылықты жоя аламыз. Тәжірибе мен білім алмасу олқылықтың орнын толтыра алады.

Форумға арнайы қатысқан еліміздің Мәдениет және ақпарат вице-министрі Қанат Ысқақов қоғамға төнген ақпараттық қауіпке қарсы тұру үшін мемлекеттер арасында жүйелі іс-қимыл қажет екенін атап өтті.

Қанат Ысқақов, ҚР Мәдениет және ақпарат вице-министрі:

- Ең басты үш тәсіл бар. Ең алдымен, ол, әрине медиасауаттылық. Біздің халқымызға азаматтарымызға керек әрдайым біз жеткізіп тұру керек. Екінші тәсіл, ол әрине медиабасшылардың бірге жұмыс жасауы.Үшінші бағыт ол мемлекеттік саясат, яғни мемлекеттік органдар. Жалған ақпаратты дер кезінде жоққа шығару.

Қазақстандық медиа да бұл бағытта белсенді жұмыс жүргізіп келеді. Еліміздегі жетекші ақпараттық арна 24KZ телеарнасы дезинформацияға қарсы арнайы жобаларды іске асырып, халықаралық серіктестік аясын кеңейтуде.

Талғатбек Әбдіқожаев, 24KZ телеарнасы:

- «Хабар» агенттігі Әзербайжанның Баку Тв, Репорт деген сияқты белді ақпарат агенттіктерімен меморандумға отырған. Және алдағы уақытта қазір, мысалы, Қырғызстанның ұлттық телерадиокорпорациясымен меморандумға отыру туралы жоспарланып жатыр.

Дезинформацияға қарсы күрес тек бірлесе әрекет еткенде ғана нәтижелі болмақ. Сарапшылар осындай пікірде тарқасты. Ал Анкарадағы форум осы ұстанымның нақты қадамына айналды.

Ә.Нұрлыбаева, Ж.Сүйіндіков