Түркістан облысында 1 кент пен 32 елдімекенге газ беру уақытша тоқтатылды

Бұл оқиғаға қатысты «QazaqGaz Aimaq» АҚ баспасөз қызметі ресми мәлімдеме таратты.

— Топырақты ашу барысында дәнекерленген түйіспе қосылысының ашылып кетіп, герметизациясының бұзылғаны белгілі болды. Апаттық бригада қауіпсіздік мақсатында «Мақтаарал» ГТС-тен кейінгі диаметрі 300 мм ысырманы жапты. Қазіргі уақытта 1 кент пен 32 елдімекенге газ беру уақытша тоқтатылды. Шамамен 9 мың абонент, сондай-ақ коммуналдық және өнеркәсіптік тұтынушылар газдан уақытша ажыратылды, — делінген ресми хабарламада.

Апатты қалпына келтіру жұмыстары жалғасуда. Газ беру қайта басталғанда қосымша хабарланбақ.

— Газбен жабдықтауды тоқтату — мәжбүрлі шара. Апаттық жағдайды жою тәулік бойы жүргізіледі. Сондықтан тұрғындардан түсіністік танытуды сұраймыз. Қалпына келтіру жұмыстары толық аяқталған соң газбен жабдықтау қауіпсіз және тұрақты түрде қайта іске қосылады, — деді мекеменің жауапты өкілдері.

Бұдан бұрын биыл 60-тан астам елді мекен тұрғындары көгілдір отынға қол жеткізетіні туралы жазған едік.