Tomahawk зымырандарын Украинаға беру процесі уақытша тоқтатылды Рада

АСТАНА, 17 қазан – Sputnik. АҚШ-тың Tomahawk зымырандарын Украинаға беру процесі уақытша тоқтатылды, деп хабарлады жұма күні Жоғарғы Раданың Ұлттық қауіпсіздік, қорғаныс және барлау мәселелері комитетінің төрағасы Егор Чернев.

Украина басшысы Владимир Зеленский жұма күні Мәскеу уақытымен 20:00-де АҚШ президенті Дональд Трамппен кездесіп, Tomahawk зымырандарын алу мәселесін талқыламақ.

"Әзірге Tomahawk зымырандарына қатысты мәселе уақытша тоқтатылады. Мәселе талқыланады", - деді Чернев "Мы – Украина" телеарнасының эфирінде.

Ресей және АҚШ президенттері Владимир Путин мен Дональд Трамп бейсенбі күні телефон арқылы сөйлесті. Әңгімелесуден кейін Трамп Ресей басшысымен Венгрияның астанасы Будапеште кездесетінін мәлімдеді.

Әңгіме барысында Киевке жеткізілуі мүмкін Tomahawk қанатты зымырандарына қатысты мәселесі көтерілді, деп хабарлады Ресей президентінің көмекшісі Юрий Ушаков.