Түркістанда адамдар сушидан уланған кафе қайтадан заңсыз жұмыс істеген

Облыстық Санитариялық-эпидемиологиялық бақылау департаментінің мәліметінше, соңғы 3 жылда өңірде тағамнан уланудың 6 жағдайы тіркеліп (Арыс - 1, Кентау - 1, Келес - 1, Түркістан - 2, Сайрам - 1), 200-ден аса адам зардап шеккен.

– Биыл Түркістан қаласында орналасқан «Ямми Маки» фаст-фуд орталығынан пицца, суши, тауық тағамдарын тапсырыспен үйге алдыртып тұтынған 68 адам зардап шегіп, қоғамдық тамақтану орны жабылған. Алайда жеке кәсіпкер тапсырыспен халыққа қызмет көрсетуін тоқтатпаған. Қаладағы Нышанов көшесі №1А мекенжайындағы осы нысанда екінші рет тамақтан улану жағдайы тіркелді. Зардап шеккендер саны - 14 адам. Науқастардың барлығы пицца, суши тағамдарын тапсырыспен үйге алдыртып тұтынған, – деді облыстық Санитариялық-эпидемиологиялық бақылау департаменті басшысының орынбасары Асқар Бекболатұлы.

Аталған жағдайларға байланысты облыстық Санитариялық-эпидемиологиялық бақылау департаментінің аумақтық басқармалары тарапынан нысандарға жоспардан тыс тексеру жүргізіліп, санитариялық-эпидемиологиялық талаптардың сақталмай өрескел кемшіліктерге жол берілгендігі анықталды.

Қазір нысан жабылып, полиция бөлімі тарапынан қылмыстық іс қозғалған. Сонымен қатар департамент тарапынан жалпы 919 тамақтану орнына профилактикалық бақылау жүргізілген.

Бұдан бұрын Түркістан облысындағы қоғамдық тамақтану орындарында улану жағдайлары жиілегенін жазған едік.