Түркістанда интернет алаяқтық схемаларына қатысы бар 239 дроппер әшкереленді

Республикалық «Антифрод» жедел-профилактикалық іс-шарасы барысында өңірде бұрын жасалған 42 қылмыс ашылып, интернет-алаяқтыққа қатысы бар 89 тұлға анықталған. Сондай-ақ бір ұйымдасқан топтың әрекетіне тосқауыл қойылып, қылмыстық іс сотқа жолданды.

Полиция мәліметінше, жәбірленушілерге 220 миллион теңге көлеміндегі шығын өтелген.

— Сонымен қатар заңсыз қаржы операцияларына қатысы бар 239 дроппер анықталды. Олардың 19-ына қатысты қылмыстық іс қозғалды. Бұдан бөлек «активатор» қызметін атқарған бір адам жауапкершілікке тартылып, одан қылмыстық схемаларда пайдаланылған 150 SIM-карта тәркіленді, — делінген облыстық полиция департаменті таратқан ақпаратта.

Интернет кеңістігін мониторингтеу нәтижесінде 240 заңсыз контент бұғатталған. Ал «Есіктен есікке» қағидаты бойынша жүргізілген ауқымды ақпараттық-түсіндіру жұмыстары аясында 181 260 үй қамтылып, 983 мыңнан астам азаматқа ескерту жасалды.

Бұдан бұрын 2025 жылы облыста интернет-алаяқтыққа қатысты 843 қылмыс дерегі тіркеліп, жәбірленушілерге 1 млрд 665 млн теңгеден астам шығын келгенін жазған едік.