Түркістандық дәрігерлер миына қан құйылған 3 айлық сәбиді аман алып қалды

Сарыағаш аудандық орталық ауруханасында 3 айлық сәбиді медициналық тексеру кезінде ми ішіне қан құйылғаны анықталған. Дәрігерлер шешімімен науқасқа шұғыл ота жасалған, деп жазады Egemen.kz.

Фото: Түркістан облыстық Денсаулық сақтау басқармасы

Отаны Түркістан облыстық балалар ауруханасының нейрохирург-дәрігерлері жасаған.

Облыстық Денсаулық сақтау басқармасының мәліметінше, сәбидің ми қуысына сыртқы дренаж орнату операциясы сәтті аяқталған. 

«Ота барысында трепанация жасалып, арнайы түтікше арқылы 3-4 мл көлеміндегі қан жиналған аймақ толық тазартылды. Бір аптадан кейін нәресте Сарыағаш аудандық орталық ауруханасынан Түркістан облыстық балалар ауруханасына ауыстырылды. Қазір оның жағдайы тұрақты, қажетті ем-шара жүргізіліп жатыр», делінген хабарламада.

Енді дәрігерлер алдағы уақытта сәбиді компьютерлік томографияға түсіріп, жағдайына қарай түтікшені алып тастау немесе қосымша ота жасау мәселесін қарастырады.