Уимблдон : үміт ақталмады

Юлия Путинцева мен Александр Шевченко алғашқы айналымнан аса алмады. Бірі – Татьяна Маринадан (Испания), екіншісі Феликс Оже-Альяссимнен жеңілді. Жарысты қарқынды бастаған Елена Рыбакина Лоис Буассон (Франция) мен Кетти Макнеллиді (АҚШ) ұтқанымен, үшінші кезеңде Элисе Мертенске (Бельгия) жол берді. Бастапқы бәсекелерде Танаси Коккинакис (Аустралия), Кириан Жаке (Франция) және Фрэнсис Тиафоны (АҚШ) қапы қалдырған Александр Бублик одан кейін Тэйлор Фрицке (АҚШ) есе жіберді.

Жерлестеріміз жарысты ерте аяқ­та­ғанымен, материалдық тұрғыдан ештеңе жоғалтқан жоқ. Керсінше, ол жағынан ол­жаға кенелді. Өйткені «Үлкен дулыға» (ҮД) санатындағы турнирлердің жүлде қоры мол екені баршаға мәлім. Биыл «Уимблдонда» ол 64,2 миллион фунт-стерлингті (88 миллион долллар) құрады. Жекелеген сайыста жеңімпаз атанған теннисшілер 3,6 миллионды олжаласа, финалда ұтылғандар сол соманың тең жартысын алды. Жартылай финалға жеткендер 900 мыңды иеленсе, ширек финалға шыққандардың есепшотына 480 мың доллар аударылды. Жерлестеріміздің арасынан ең үздік нәтиже көрсеткен А.Бублик 300 000 фунт-стерлингті еншілесе, үшінші айналымда сүрінген Е.Рыбакина 185 000-ды әмиянына салды. Тұсаукесер кездесулерінде жеңілістің кермек дәмін татқан Ю.Путинцева мен А.Шевченко 80 000-нан еншіледі.

Жұптық бәсекеде өзін жақсы қырынан көрсетіп жүрген Анна Данилина осы жолы оңбай сүрінді. Сербиялық Александра Крунич екеуі үшінші кезеңде Ингрид Нил (Эстония) мен Джулина Олмодтан (Мексика) ұтылды. Миксте де Данилина мандытып өнер көрсете алмады. Ал жастар буыны арасындағы додада Заңғар Нұрланұлы үшінші айналымға жетті. Бұл межеде қандасымыздың жолын германиялық Винсент Райзах бөгеді. Сол секілді Дамир Жалғасбайдың да жолы болмады. Сөйтіп, биылғы «Уимблдон» біздің теннисшілер үшін сәтсіз аяқталды.

Үздіктер жайында айтар болсақ, ерлердің жартылай финалында германиялық Александр Зверев (АТР №3) ұлыбританиялық Артур Фериді (АТР №114) ұтты – 7:6, 6:2, 6:4. Келесі кездесу әлемнің бірінші ракеткасы, италиялық Янник Синнер (АТР №1) мен жер-жаһандағы ең атақты теннисші, «Үлкен дулыға» турнирлерінің 24 дүркін жеңімпазы, сербиялық Новак Джокович (Сербия) арасында өтті. Екеуінің жас айырмашылығы бақандай 15 жасты құрады. Янник 24-те, Новак 39-да. Бұл бәсекеде Синнер Джоковичке еш мүмкіндік бермеді – 6:4, 6:4, 6:4. Ал бас жүлде үшін бәсекеде Апеннин түбегінің тарланы Зверевтің осал тұсын оңай тапты – 6:7, 7:6, 6:3, 6:4. Осылайша, 24 жастағы Янник Синер «ҮД» додаларында бесінші титулына қол жеткізді.

Әйелдер арасындағы финалда Каролина Мухова (WTA №9) мен Линда Носкова (WTA №12) шеберлік байқасты. Бұған дейін екеуі де «ҮД» додаларында дараланған емес. Каролина 2023 жылы Ролан Гарростың финалында ойнады, ал Линаның ең үздік көрсеткіші – 2024 жылы Аустралияның ашық біріншілігінің ширек финалына дейін жетуі. Чехиялық теннисшілердің финалдық дербиі 21 жастағы Носкованың пайдасына шешілді – 6:2, 5:7, 6:3.