Ұлттық құрылтай: реформалар мен нақты шешімдер

Ұлттық құрылтай бес жылда ел дамуына бағытталған нақты нәтижелерге қол жеткізді.

Құрылтай мінберінде көтерілген ұсыныстар негізінде ондаған заң қабылданып, әлеуметтік мәселелердің шешілуіне жол ашылды. Әйел мен бала қауіпсіздігі, еңбек адамының мәртебесі, зиянды әдеттермен күрес күн тәртібіне шықты. Алдағы саяси реформалар мен ірі инфрақұрылымдық жобалар өңірлердің әлеуетін арттыруға бағытталған. Сарапшылардың айтуына қарағанда, бұл бастамалар экономикаға серпін беріп, халықтың болашаққа деген сенімін күшейтеді.

Ұлттық құрылтай бес жыл ішінде өз миссиясын толық орындады. Алқалы жиында ел дамуы үшін маңызды мәселелер көтерілді. Құрылтай мінберінде айтылған ұсыныстар негізінде 26 заң қабылданды. Әйелдер құқығы мен балалардың қауіпсіздігін қамтамасыз етуге бағытталған нақты қадамдар жасалды. Ойынқұмарлық пен нашақорлыққа қарсы күрес күшейтілді. Ономастика саласы жүйеленіп, еңбек адамдарының мәртебесі артты. Тізе берсе, нәтижелі істер аз емес.

Нұртай Сабильянов, Ұлттық құрылтай мүшесі:

- Өткен құрылтайда мемлекет басшысы шекаралық аумақтарды дамытуға байланысты заң жобасын дайындауды тапсырған болатын. Парламент Мәжілісі осы заң жобасын дайындап, қазір кезде талқылауды бастады. Яғни осы заң қабылданатын болса, онда шекара маңында орналасқан 65 ауданның 3 жарым миллионға жуық халқының тұрмысы жақсаратын болады. Міне, осындай игі істер Ұлттық құрылтайда жүзеге асып жатыр. 

Алда маңызды саяси өзгерістер күтіледі. Сарапшылар бір палаталы парламенттің құрылуы халықтың болашаққа деген сенімін арттырады деп бағалап отыр.

Әлихан Байменов, Ұлттық құрылтай мүшесі:

- Бұл халық үніне құлақ иасудың бір көрінісі. Екінші жағынан партиялық тізіммен, Парламент жасақталғанда оның аты Құрылтай болатын болды. Бұл Құрылтай деген атаудың өзі әрбір депутатқа қосымша жауапкершілік, қосымша салмақ жүктейтін секілді. Ол сонымен қатар біздің ұлттық ерекшелігімізді де айқындап отыр. Ұлттың, мемлекеттің ұзақ мерзімді дамуына байланысты ой-пікірі, ұсынысы бар топтардың халық кеңесі арқылы өз ұсыныстарын Президентке жеткізіп, парламентке бастамашыл құқығы болса, парламентке ұсынуы, бұл да біздің мемлекеттік басқару үлгісінде азамет пен мемлекет арасындағы байланыс тетіктерін нығайтудың жолы.

Ұлттық құрылтайдың бесінші отырысында Президент ел экономикасына серпін беретін ірі инфрақұрылымдық жобаларды жүзеге асыруды тапсырды. Оның ішінде Қызылорда-Жезқазған автожолының Ұлытау облысына тиесілі бөлігін салу, сондай-ақ жылу-электр станцияларын жаңғырту мәселелері бар.

Мақсат Толықбай, Ұлттық құрылтай мүшесі:

- Бұл ең бірінші біздің тарихтағы инвесторлардың ақшасына салынған заманауи жылу электр станциясы міне Қызылордада салынып, жұмыстар аяқталды. Әрі қарай Екібастұз болсын, Өскеменде болсын, Абайда, Көкшетауда салуымыз керек. Бұл үлкен стратегиялық жобалар. 

Ерлан Саиров, Ұлттық құрылтай мүшесі:

- Президент жасанды интелект пен цифрландыру мәселесіне өте назар аударды. Өйткені 21-ғасыр цифровизация ғасыры. Яғни біз осы процестің ішінде болып, осы аймақта сол цифровизацияның көшбасшысы болуымыз керек. 

Құрылтай мүшелерінің айтуынша, Президент көтерген бастамалардың түпкі мақсаты – ел дамуына тың серпін беру.

Нұрлан Жақыпбеков, Ақан Әлиев, Нұржан Мұзарапшин