Реформалар нақты нәтижемен өлшенеді

Жаңа бюджет кодексі бойынша шағын және орта бизнестен түсетін табыс салығы аудандық бюджетке беріледі.

Бұл туралы Сенат төрағасы Мәулен Әшімбаев Қызылорда облысының барлық деңгейдегі мәслихат депутаттары және зиялы қауым өкілдерімен кездесуде түсіндірді. Басқосуда Мемлекет басшысының цифрландыру және жасанды интеллектіні дамытуға қатысты бастамаларын іске асыру мәселелері талқыланды. Палата Спикері Президенттің «Қуатты өңірлер – қуатты ел» қағидатына ерекше мән беріп, жергілікті биліктің бюджеттік дербестігін арттыру бағытында ауқымды өзгерістер жасалып жатқанын атап өтті. Қазіргі таңда салықтар мен төлемдердің 25 түрі жергілікті деңгейге берілген. Сондай-ақ кездесулерде парламенттік реформа, бір палаталы Парламентке көшу бастамасы және өңірдің әлеуметтік-экономикалық даму перспективалары сөз болды.

Мәулен Әшімбаев, ҚР Парламенті Сенатының төрағасы:

- Президентіміз Қасым-Жомарт Кемелұлы Тоқаевтың бастамасымен елімізде кешенді реформалар іске асырылып жатыр. Басты мақсат – әділетті мемлекет, тиімді экономика және жауапты басқару жүйесін қалыптастыру. Осы аптаның басында «Түркістан» газетіне Президентіміз Қасым Жомарт Кемелұлы Тоқаевтың көлемді сұқбаты жарияланған болатын. Онда мемелекет басшысы еліміздің қазіргі ахуалына және алдағы даму бағдарына кеңінен тоқталды. Бұл елімізді әділетті, демократиялық ашық мемлекетке айналдыруға бағытталған жүйелі саясаттың жарқын көрінісі. Осы жолда ұлт болып ұйысып, Президентіміз белгілеп берген стратегиялық міндеттерді орындауға белсенді атсалысамыз деп сенемін.

Сенат төрағасы Қызылорда қаласындағы «Сыр жұлдыздары» инновациялық шығармашылық орталығының жұмысымен танысты. Осы жерде өңір жастарымен кездесіп, еркін пікір алмасты. Өңірдің креативті жастарымен кездесуде үздіксіз даму, цифрлық сауаттылықты арттыру және озық технологияларды игеру жөнінде кеңінен әңгіме қозғалды. Сапар аясында Сенат депутаттары Қазақстан халқы Ассамблеясының мүшелерімен кездесіп, Мемлекет басшысының тапсырмасымен қайтарылған заңсыз активтер есебінен салынған физика-математика бағытындағы мектеп-интернатта болды. Сондай-ақ сенаторлар ерекше қажеттіліктері бар балалар мен жастарға арналған Инклюзивті спорт орталығына барып, көрсетілетін әлеуметтік және түзету-дамыту қызметтерімен танысты. Бұдан бөлек депутаттар «Тұмар» шағын өнеркәсіптік аймағының өкілдерімен шағын және орта бизнесті қолдау мәселелерін талқылап, облыстық тарихи-өлкетану музейі мен әуежайдың жаңа терминалын аралап көрді.