Ұлы Отан соғысы батырларының сүйегі Қазақстанға жеткізілді

Астанада Ұлы Отан соғысы жылдарында қаза тапқан қазақстандық жауынгерлер Байбол Рахметов пен Мұсақан Қалмырзаевтың сүйектерін тапсыруға арналған салтанатты рәсім өтті. Іс-шара Қазақстан Республикасы Қарулы күштері Ұлттық әскери-патриоттық орталығында ұйымдастырылып, оған Қорғаныс министрлігінің өкілдері, ардагерлер, қоғамдық ұйымдар мүшелері, жергілікті атқарушы органдардың өкілдері, әскери қызметшілер, «Жас сарбаз» қозғалысының тәрбиеленушілері және Байбол Рахметовтың туыстары қатысты.

Қызыләскерлердің сүйегін тапсыру рәсімі Орталық әскери оркестр мен Құрмет қарауыл ротасының қатысуымен өтті. Жауынгерлердің сүйектерін табу Псков облысында жүргізілген далалық зерттеулер мен іздеу топтарының еңбегінің арқасында мүмкін болды.

Қорғаныс министрлігі Тәрбие және идеологиялық жұмыс департаментінің бастығы әділет полковнигі Тілеухан Басқожаев соғысқа 1,2 миллионнан астам қазақстандық шақырылып, олардың 600 мыңнан астамы майданда қаза тапқанын атап өтті. Оның айтуынша, батырлардың ерлігі болашақ ұрпақ үшін мәңгілік моральдық бағдар болып қала бермек.

«Мемориалды аймақ» іздеу тобының негізін қалаушы, Еуразия ұлттық университетінің профессоры Майдан Құсайынов қаза тапқан жауынгерлердің туыстарына «Ерлік пен борышқа адалдық» медалін табыс етті.

Қызылорда облысының тумасы Байбол Рахметов 1917 жылы дүниеге келген. Ол 1101-ші атқыштар дивизиясы, 356-шы атқыштар полкінде оқтаушы атқыш болып қызмет еткен және «Қызыл Жұлдыз» орденімен марапатталған. Оның сүйегін «Обелиск» іздеу тобы тапқан. Мұсақан Қалмырзаев 1921 жылы Оңтүстік Қазақстан облысында туған. Оның сүйегін Псков облысындағы Турки-Перевоз ауылы маңынан «Псковский рубеж» іздеу тобы тапқан.

Жауынгерлер әскери құрметпен қайта жерленеді: Байбол Рахметов Қызылорда облысында, ал Мұсақан Қалмырзаев Түркістан облысында жер қойнына беріледі.

Бұл рәсім қазақстандық батырлардың есімін мәңгі есте сақтап, олардың ерлігін ұрпаққа үлгі етуге бағытталған маңызды оқиға болды.

Бүгін, 14:41