ҰҚК және ІІМ қызметкерлері сотталушыға АҚШ тан есірткі тасымалдауға көмектескен

АЛМАТЫ, 28 қазан – Sputnik. Алматы қаласының арнайы прокурорлары есірткі контрабандасы бойынша сотқа дейінгі тергеп-тексеруді аяқтады, деп хабарлайды Бас прокуратура.

Ведомствоның мәліметінше жазасын пенитенциарлық мекемеде өтеп жатқан адам АҚШ-тан Алматыға есірткі құралы – марихуана мен каннабис сығындысы салынған сәлемдемелерді жеткізу арнасын ұйымдастырғаны анықталды.

Қылмыстық әрекетке ұйымдастырушылар, кураторлар, қамқоршылар, дропперлер, жасырын белгілеушілер және өлшеп ораушылар тартылған.

"Жедел іс-шаралар нәтижесінде "Жетісу" кеден бекетінде салмағы 43 кг құрайтын марихуана мен каннабис сығындысы салынған 25 сәлемдеме тәркіленді. Олар іс бойынша заттай дәлелдемелер деп танылды", - деп жазылған хабарламада.

20 күдікті, оның ішінде ұлттық қауіпсіздік органдарының 2 қызметкері және қылмыстық топтың қызметіне қамқорлық көрсеткен ҚР ІІМ ҚАЖК-нің 3 қызметкері ұсталды. Айыпталушыларға есірткі заттарын тасымалдап, сатқаны, сондай-ақ лауазымдық қылмыс жасағаны үшін айып тағылды.

"Заңсыз қызметтен алынған табысқа күдіктілер жылжымайтын мүлік, жер учаскелерін және автокөлік құралдарын сатып алған. Соттың санкциясымен 5 пәтерге, 3 құрылысқа, 10 жер учаскесіне және 44 автокөлік құралына тыйым салынды", - дейді Бас прокуратура.

Қылмыстық іс Қылмыстық істер жөніндегі мамандандырылған ауданаралық сотына жолданды.