Ұстаздар жасанды интелектіні қолдану әдістерін меңгерді

Ақтауда «Педагог және ЖИ: заманауи цифрлық оқыту құралдары» тақырыбында тренинг өтті. Іс-шараны Тимур Құлыбаевтың Halyk қорының «Тәлімгер» білім беру жобасы және Маңғыстау облысы әкімдігінің қолдауымен NNEF қоғамдық қоры ұйымдастырды. Семинар-тренингке Ақтау, Жаңаөзен, Бейнеу, Мұнайлы және Түпқараған аудандарынан 60 педагог қатысты, деп хабарлайды Egemen.kz.

Жасанды интеллекттің мүмкіндігін тиімді пайдалану

Семинардың негізгі мақсаты – мұғалімдерге жасанды интеллектіні білім беруде тиімді құрал ретінде көрсету. Заманауи технологиялар осыған дейін білім беруде қолданылып келген дәстүрлі тәсілдерді тез өзгертіп жатыр. Ал жасанды интеллект енді педагогтардың күнделікті жұмысының бір бөлігіне айналып, сабаққа дайындалуға, тесттер мен көрнекі материалдар жасауға, оқыту үдерісін оқушының жеке қабілетін ескеріп бейімдеуге көмектесетін таптырмас құралға айналып үлгерді.

«Білім беру саласын дамыту және педагогтардың құзыреттілігін арттыру – жұмысымыздың басты бағыттарының бірі. Мұғалімдердің кәсіби тұрғыдан өсуіне және жаңа технологияларды барынша меңгеруіне мүмкіндік жасауға барымызды саламыз. Сондықтан Halyk қорымен бірге осындай білім беру бастамаларын жүзеге асырып келеміз», деді NNEF қоғамдық қорының білім беру бөлімінің басшысы Мария Ковжасарова.

Оқытудың бес практикалық модулі

Семинар бағдарламасы жалпы ұзақтығы 20 сағатты қамтитын бес практикалық модульден тұрды. Оның біріншісі – «ЖИ білім беруде». Мұнда жасанды интеллектінің мүмкіндіктері, цифрлық оқыту әдебі және академиялық адалдық негіз болады. Екінші модуль – «ЖИ көмегімен сабаққа дайындалу»: ChatGPT және басқа платформаларды жоспар, тест және тапсырма әзірлеуде пайдалану. Үшінші модуль – «Визуалды контент жасау»: Gamma AI және Canva арқылы презентациялар дайындау. Төртіншісі – «Мультимедиа және инфографика»: видео, сурет және аудио материалдарды дайындауға қажетті құралдарды меңгеру. Бесінші модуль – «Геймификация»: EducaPlay, Quizizz, Classcraft платформалары арқылы оқушылардың білімге қызығушылығын арттыру.

Бұл модульдердің барлығы практикалық жаттығуларға негізделген. Курс барысында қатысушылар дәріс тыңдап қана қоймай, өздеріне қажетті оқу материалдарын жасап, ЖИ құралдарын қолданып, өз жұмысындағы нақты кейстерді талқылауға мүмкіндік алды.

«ЖИ мүмкіндіктерін түсіндіріп қана қоймай, мұғалімдерге бұл құралдарды сыныпта қалай қолдана алатынын көрсету біз үшін басты мақсат болды. Ақтау мен аудандардан келген мұғалімдер белсенді түрде тренингке қатысып, сұрақтар қойып, түрлі тәжірибе жасағаны бізді қатты қуантты», деді бағдарлама тренері, Алматы қаласындағы «Мирас» халықаралық мектебінің оқытушысы Ерлан Керімбай.

Ал білім беруде жасанды интелектіні қолдану тақырыбы бойынша Будапешт университетінде диссертация қорғап келген, жобаның тренері Адиля Батталованың айтуынша, жасанды интеллектіні мұғалімді алмастыратын құрал деп емес, көмекші ретінде қабылдау керек.

«Мұғалімдерге ChatGPT және басқа да жасанды интеллект құралдарының таптырмас көмекші болатынын көрсеттік. Ең бастысы, сыни тұрғыдан ойлау, шығармашылық әдіс-тәсілді қолдану», деді бағдарлама тренері Адиля Батталова.

ЖИ арқылы сабақты түрлендіре түсуге болады

Тренингке қатысқан педагогтар жасанды интеллект сабақты барынша түрлендіре түсіп, оқушының қызығушылығын арттырудың оң жолы екенін айтады.

«Жасанды интеллектке қатысты курстан өтіп, біз тек ChatGPT құралы жайлы ғана емес, балалармен жұмыс істеудің тиімді тәсілдерін, оқушының дамуына, мамандық таңдауына бағыт беру жолдарын да үйрендік. Біз түрлі бағдарламаны меңгеріп, өте пайдалы кеңестер алдық», деді Басқұдық ауылындағы №14 орта мектебінің мұғалімі Айтбибі Бекова.

Маңғыстау облысы білім басқармасы оқу-әдістемелік орталығының қоғамдық-гуманитарлық білім беру бөлімінің басшысы Жансая Молдажанованың айтуынша, қазір жасанды интеллект қоғам дамуына әсер ететін негізгі технологиялардың біріне айналды.

«Оған мемлекет басшысы Қасым-Жомарт Тоқаев та ұстаздардың тамыз кеңесінде аса мән берген болатын. Жасанды интеллект қазір білім беру саласына да белсенді түрде енгізіліп жатыр», дейді.

Іс-шара соңында тренингтің барлық қатысушысына жасанды интеллектіні білім беруде қолдануға қажетті дағдыларды меңгергенін растайтын сертификат табысталды. Педагогтар бұл жаңа тәсілдерді өз мектептері мен колледждерінде енгізуді жоспарлап отыр.

NNEF қоғамдық қоры мен Тимур Құлыбаевтың Halyk қоры осындай білім беру бастамаларын жалғастырып, бағдарламаның ауқымын кеңейту әрі қатысушылар санын арттыруды көздеп отыр. Жобаның басты мақсаты – мұғалімнің өзіне сенімділігін арттырып, оқушыға заман талабына сай білім алатын тұрақты цифрлық оқыту экожүйесін қалыптастыру.