Ұзынағашта жаңа емхана ашылды

Алматы облысындағы Жамбыл ауданының орталығы, Ұзынағаш ауылында емхана ашылды. Заман талабына сай жабдықталған нысан тұрғындарға сапалы медициналық қызмет көрсетеді. «Дәрігерлер күніне 250 адамды қабылдай алады», - дейді мамандар. 

Ұзынағашта пайдалануға берілген емхана халқы тығыз қоныстанған Жамбыл ауданының 200 мыңнан астам тұрғынына қызмет көрсетеді. Мұнда жоғары технологиялы диагностикалық аппараттар және жедел медициналық көмекке арналған заманауи жабдықтар орнатылған.

Марат Сұлтанғазиев, Алматы облысының әкімі:

- Мемлекет басшысы еліміздегі, әсіресе өңірлердегі алғашқы медициналық-санитарлық көмек көрсету жүйесін нығайтудың маңыздылығын үнемі назарда ұстайды. Осы жобаның жүзеге асырылуы – сол жүйелі жұмыстың нақты көрінісі.

Ержан Сүлейменов, облыстық Денсаулық сақтау басқармасының басшысы:

- 250 адамды бір күнде қабылдайтын емхана ашылып жатыр. Бұл – жаңа емхана. Емхананың құрал-жабдықтары заманымызға сай.

Мекеменің штаттық құрамында 324 қызметкер бар. Алматы облысында «Ауылдық денсаулық сақтауды жаңғырту» ұлттық жобасы аясында биыл жалпы құны 8,2 млрд теңге болатын 38 денсаулық сақтау нысаны салынды. 

Авторлары: Ардақ Айбарұлы, Аят Дүйсенбаев, Аманжол Жөңкешов