Қосшы қаласында жаңа емхана бой көтерді

Қосшы қаласында бір ауысымда мың адамды қабылдай алатын жаңа емхана бой көтерді.

Жалпы аумағы 30 мың шаршы метрді құрайтын ірі медициналық орталық заманауи құрал-жабдықтармен толық қамтамасыз етілген. Жаңа орталық тек Қосшы қаласының тұрғындарына ғана емес, Ақмола облысының Шортанды, Ерейментау, Егіндікөл, Аршалы, Қорғалжын, Целиноград және Астрахан аудандарындағы 100 мыңнан астам тұрғынға медициналық қызмет көрсетеді. Жоба аясында емхана құрылысы ауруханамен жалғаспақ. Жазға дейін  350 медициналық төсекпен жабдықталады. Осылайша  700-ден астам тұрақты жұмыс орны ашылды. Қазіргі таңда медициналық мекемеге білікті мамандар тартылып жатыр.

Марат Ахметжанов, Ақмола облысының әкімі:

- Емханадан, ауруханадан бөлек, бұл жерде пансионат салынады. Ол дегеніміз – біздің ауылдан ем алуға келген адамдармен бірге еріп келген жандардың сол пансионатта тоқтауына мүмкіндік болады. Осы жазда құрылысы басталатын 100 пәтерлік үй салынады. Сапалы, жақсы үй. Бұл – мамандарды тарту үшін, үлкен дәрежедегі, жоғары деңгейдегі білімді мамандарды тарту мақсатында қолға алынған жоба. Сол мамандар осы баспанамен қамтылады. Нәтижесінде пансионаты, емханасы, ауруханасы және жедел жәрдемі бар тұтас жабық кешен болады.