WhatsApp та ата аналарға арналған жаңа бақылау функциясы енгізіледі

WhatsApp мессенджерінде балаларға арналған арнайы аккаунттар пайда болады.
Жаңа функция ата-аналарға баланың байланыс баптауларын басқаруға және оның кіммен хат алмаса алатынын бақылауға мүмкіндік береді.

Әзірлеушілердің мәліметінше, бұл функция қосылған кезде қосымшаның кейбір мүмкіндіктері шектеледі. Балаларға арналған аккаунтта негізінен чаттар мен қоңыраулар ғана қолжетімді болады, ал бірқатар функциялар мен контент шектеледі.

Ата-аналар арнайы баптаулар арқылы:

баламен кім байланыса алатынын анықтай алады;

баланың қандай топтарға қосылатынын таңдайды;

белгісіз контактілерден келген хабарламаларды тексереді;

аккаунттың құпиялылық параметрлерін басқарады.

Қауіпсіздік үшін бала бұл баптауларды өздігінен өзгерте алмайды. Кез келген өзгеріс енгізу үшін ата-анасы ғана білетін 6 таңбалы PIN-код қажет болады.

Ата-аналық бақылауды қосу үшін баланың телефоны мен ата-ананың смартфонын өзара байланыстыру керек. Ол үшін баланың телефонына WhatsApp орнатып, арнайы баптаулар арқылы ата-ана басқаратын аккаунтты тіркеу және QR-код арқылы құрылғыларды байланыстыру қажет.

Жаңа функция алдымен бірқатар елдерде сынақ ретінде іске қосылып, кейін біртіндеп әлемнің басқа өңірлеріндегі пайдаланушыларға да қолжетімді болады.