Ырғыз өзенінің бойына гидробекеттер орнатылды

Келер көктемге қазірден сайлану қажет. Ақтөбе облысы өзен-көлдердің тұсына 20 гидробекет орнатты. Сосын жағалауды бекітіп, бөгеттерді биіктетті. Ал гидробекеттер келген судың мөлшерін дәл анықтап отыру үшін қажет.

Қаз-қатар тізілген мына қазықтар Ырғыз өзенінің деңгейін бақылап отыру үшін қажет. Әрқайсысының реттік нөмірі бар. Көктемде су арнасынан тасығанда бақылауға қажет болса, күзде келер жылға болжам жасауға қолданылады.

Былтыр бұл өңірдегі бірнеше елді мекенді су басқан еді. Қираған ауыл тұрғындарын қайықпен және тікұшақпен құтқаруға тура келді. Сондықтан мамандар Ырғыз бен Торғай өзендерінің деңгейін бақылап отыру үшін алты ауылдың тұсына гидробекет орнатты.

Галина Станкевич, «Қазгидромет» РМК облыстық филиалының инженер-гидрологы:

- Облыста жыл бойы жұмыс істейтін 24 гидробекет бар. Олар судың деңгейі мен температурасын, ауа температурасын бақылайды. Кей бекеттерде қар және мұздың қалыңдығы, су шығындары өлшенеді. Ал уақытша орнатылған бекеттерде судың деңгейі, қардың сөгілу, сеңнің қозғалу уақыттары бақыланады.

Соңғы екі жылда облыс аумағында 20 уақытша гидробекет орнатылған. Ауыл-аймаққа қаупі бар өзен-көлдердің бойындағы өлшеу құралдарын мамандар тек көктем айлары қолданады. Яғни ақпанның соңынан мамырға дейін тиісті ақпарат алып, сарапталады. Бұдан бөлек тасқын судың арнасын бұру жұмыстары да жүргізілді. Мәселен, Ырғыз ауданындағы 6 ауылдың сыртына бөгет тұрғызылды.

Дулат Кенжебаев, Ырғыз аудандық гидротехникалық құрылғыларға қызмет көрсету КММ бөлімше басшысы:

- Бөгеттің төменгі ені 6 метр, биіктігі 3 метр, жоғарғы жотаның ені 4 метр болып салынған. Жалпы жұмыстар өз деңгейінде жүргізіліп келе жатыр. Осы алты елді мекеннің салынған бөгеттер ауылдық округ әкімдерінің теңгерімінде. Мердігер компания осы екі жыл кепілдемеге байланысты қалпында ұстау мақсатындағы жұмыстарды жүргізеді.

Көктемгі су тасқынына тосқауыл ретінде биыл облыс аумағындағы елді мекендер маңына 23 шақырым бөгет салынған. 8 шақырым арық қазылды. Өзен арналарының жағасы бекітіліп 4 шақырымнан астам табаны тазартылды.

Авторлары: Мансұр Есқожин, Болатбек Молдағалиев, Айбек Даутов