Шу өзенінің төменгі ағысы суға толтырылады

Гранттық қаржыландыру аясында Қазақ су шаруашылығы ғылыми-зерттеу институты ирригация мен мелиорация салаларында төрт жобаны жүзеге асырып жатыр. Су ресурстары және ирригация министрі Нұржан Нұржігітов ғылыми ұйымның жыл басынан бері атқарған жұмысы туралы есебін тыңдады, деп жазады Egemen.kz.

Фото: kk.wikipedia.org/

Іске асырылып жатқан жобалар деградацияланған суармалы жерлердің жағдайын жақсарту технологиясын әзірлеуді, Жамбыл облысындағы Шу өзенінің төменгі ағысын сумен қамтамасыз етудің ғылыми-әдістемелік негіздерін жасауды, шағын су өткізу көлемі бар суару каналдарына қолдануға болатын гидротехникалық автоматтандырылған қақпаның моделін әзірлеуді, сондай-ақ дренаж суын қайта пайдалану арқылы суармалы жерлердің сумен қамтылуын арттыруды қамтиды.

Бүгінде «Су шығыны аз суару каналдарында қолдануға арналған гидротехникалық автоматтандырылған қақпаның моделін әзірлеу» жобасы бойынша модельдің сызбасы, пайдаланушы интерфейсі және деректер базасы дайындалған. 

«Жамбыл облысындағы Шу өзенінің төменгі ағысын сумен қамтамасыз етудің ғылыми-әдістемелік негіздері» жобасы аясында су шаруашылығы іс-шараларының жоспары әзірленген.

Дренаж суын суару мақсатында қайта пайдалану жобасы аясында ауыл шаруашылығы дақылдарын дренаж суымен суаруға арналған технология дайындалып, оған патент алынған. Бұл әдіс ауыл шаруашылығы өндірушілеріне тәжірибе жүзінде көрсетілген.

«Қазақстанның су шаруашылығы саласын дамыту үшін ғылым өте маңызды. Біздің министрлік жүзеге асыратын әрбір жобаның ғылыми негіздемесі болуы тиіс. Сондықтан Қазақ су шаруашылығы ғылыми-зерттеу институтына үміт артамыз. Бүгінде министрлік институтты қаржыландыру мәселесін толық шешті. Енді су ресурстарын тиімді пайдалануға мүмкіндік беретін нақты нәтижелер қажет. Институт министрліктің барлық бастамасына белсенді қатысып, әр жобаны жан-жақты ғылыми тұрғыдан талдауы керек», деді Су ресурстары және ирригация министрі Нұржан Нұржігітов.