Ақтөбе облысының Ырғыз ауылында қоғамдық көлік жүрмейді

Ақтөбе облысының Ырғыз ауылында қоғамдық көлік мүлде жоқ.

Тұрғындар ауыл ішінде таксимен қатынауға мәжбүр. Бұл әсіресе қыс мезгілінде оқушылар мен егде тартқан жолаушыларға қиындық тудырып отыр. Тұрғындар мәселені көтеріп, арнамыздың редакциясына шағымданған болатын. Өңірдегі тілшіміз Мансұр Есқожин жалғастырады.

Мансұр Есқожин, тілші:

- Аудан орталығының мәртебесі ауыл болғанымен Ырғызда қазір 7 мыңнан астам тұрғын бар. 4 мектепте мың жарымға жуық оқушы білім алады. Тұрғындар соңғы бірнеше жыл бойы қоғамдық көлік мәселесін көтеріп келген. Әсіресе қыс мезгілінде балалардың қатынауы қиын. 

Ауылда соңғы жылдары құрылыс қарқын алған. Ырғыздың оңтүстік-батыс бөлігінде 500-ге жуық үй пайдалануға берілген. Бірақ қоғамдық көлік ауылдың жаңа бөлігі тұрмақ, орталық көшелермен де жүрмейді. Тұрғындар әр жолы такси шақыруға мәжбүр. Бір бағытқа орташа есеппен 300 теңге төленеді. Бір үйде 2-3 оқушысы бар отбасылар үшін бұл айтарлықтай салмақ.

- Керек қой халыққа. Балалар бар оқитын. Әрдайым таксиге ақша қайда? Бір үйде 2-3 бала оқиды мысалы. Қиын меніңше. Бұрын ертеректе болып еді Ырғызда. Білмеймін. 

- Көбіне мен өз басым таксимен жүремін. Көлік керек. Автобус жүргені жақсы бізге. Соның ішінде зейнеткерлерге тиімді деп ойлаймын. 

- Автобус жүрмейді ғой осы арада. Газель жүретін еді. Ол да жоқ. Тоқтап қалды ГАЗель. 

Бұған дейін аудан орталығында жолаушылар тасымалымен жергілікті кәсіпкер айналысқан. Алайда денсаулығына байланысты қызметін тоқтатуға мәжбүр болған. Аудан әкімі Нұрлан Қызбергеновтың айтуынша, жүргізуші тапшы.

Нұрлан Қызбергенов, Ырғыз ауданының әкімі:

- Шындығын айтқанда, аудан бойынша 3-4 адам бар "D" категориясы бар жастардың ішінен. Олар біреудің жеке көлігін жүргізгісі келмейді. Сол себепті бұл мәселе шешілген жоқ. Бірақ біз оған қарап жатқан жоқпыз. Қазіргі күні, жақынды ғана жеке кәсіпкермен сөйлестік. Қаладан екі техника әкеліп осы маршрутқа қосамыз деп отырмыз.

Әкімдіктің айтуынша, Ырғыз ауылын толық аралайтын қоғамдық көлік бағыты сызылып қойған. Жоспар бойынша автобус кенттің жаңа шағын аудандарын ескі бөлігімен байланыстыруы тиіс. Дегенмен, бұл маршруттың нақты қашан іске қосылатыны әзірге белгісіз. 

Мансұр Есқожин, Болатбек Молдағалиев, Айбек Даутов