Ыстамбұлда Имамоғлұ ісін тергеу аяқталды

Түркияда Ыстамбұлдың бұрынғы мэрі Экрем Имамоғлұға қатысты шулы іс бойынша тергеу аяқталды. Нәтижеге сәйкес 3900 беттен тұратын айыптау актісінде саясаткерге бір емес, бірнеше бап бойынша ауыр айып тағылған. Тіпті бас прокуратура оны ұйымдасқан қылмыстық топ құрып, соны басқарды деп отыр. 

Ыстамбұл қаласының Бас прокуроры Акын Гүрлектің айтуынша, айыптау актісінде Имамоғлұға 828 жылдан 2352 жылға дейін бас бостандығынан айыру жазасы талап етілген. Қазір айыптау қорытындысы сотқа жолданды.

Акын Гүрлек, Ыстамбұл қаласының бас прокуроры:

- Тергеу нәтижесінде барлығы 402 күдікті анықталды. Олардың қатарында бұрынғы қала әкімі Экрем Имамоғлұ бар. Ол ұйымдасқан қылмыстық топқа басшылық жасап, түрлі заңбұзушылықтарға қатысқан деп айыпталып отыр.

Айыптау актісінде Имамоғлұға бірнеше ауыр баптар бойынша кінә тағылған. Оның ішінде: пара алу және беру, жалған құжат дайындау, мемлекеттік мүлікті зақымдау, қоршаған ортаны ластау және қызмет бабын асыра пайдалану бар. Прокуратура әр айып бойынша жеке жаза сұрап отыр. 

Ыстамбұл қаласы бас прокуратурасының мәлімдемесі

402 күдіктінің 105-і қазір қамауда отыр. 170 адам сот бақылауында. Тағы жеті адамға іздеу жарияланды. Ал Экрем Имамоғлұға қылмыстық ұйым құру және оны басқару, мемлекеттік сатып алу кезінде алаяқтық жасау, салықтық рәсімдер туралы заңнаманы бұзу, жеке деректі заңсыз тіркеу және тарату, сот шешімін орындамау және қоғамдық көлікті ұрлау баптары бойынша айып тағылып, қылмыстық іс қозғалды.

Ресми дерекке қарағанда, қылмыс жасалғаннан бері қоғамға келтірілген шығын 160 млрд лира. Бұл АҚШ долларымен есептегенде 24 млн болады. Бірақ Экрем Имамоғлуның өзі бұл айыптарды мойындамай отыр. Іс бойынша сот процесі алдағы аптада басталады.

Авторлары: Әсия Нұрлыбаева, Ж.Сүйіндіков