Зейнетақы жинағын емделуге пайдалануға қайта рұқсат берілуі мүмкін

Қазақстанда 2026 жылдың соңына қарай зейнетақы жинақтарының артық бөлігін емделуге пайдалану мүмкіндігін қайта енгізу жоспарланып отыр.
Бұл туралы Отбасы банк басқарма төрағасы Ләззат Ибрагимова мәлімдеді. Оның айтуынша, алдымен медициналық ұйымдарға бағытталатын қаражатты бақылауға арналған арнайы цифрлық платформа әзірленуі керек. Жаңа жүйе толық ашықтық пен қатаң бақылау негізінде жұмыс істейді.

Банк дерегінше, бұған дейін азаматтардың шамамен 10%-ы зейнетақы қаражатын мақсатсыз пайдаланған. Соның салдарынан бұл мүмкіндіктен 90% тұрғын айырылған.

Жаңа жүйе стоматологиялық және басқа да клиникаларда енгізіліп, көрсетілген қызмет туралы акт онлайн рәсімделеді. Сондай-ақ платформа Қазақстан Республикасының Денсаулық сақтау министрлігі жүйелерімен біріктіріледі.

Қазір банк мамандары арнайы портал әзірлеп жатыр. Сонымен қатар тұрғын үй кезегін тексеру және көпбалалы отбасылардың тұрғын үй өтінімдерін қарау жүйелері де жетілдірілуде.