Жағаға өзі жетті Каспийде аман қалған екінші сарбаз туралы не белгілі

Атырау облысынан келген 19 жастағы сарбаз Бекет Мырзағалиев - Каспий теңізіндегі қайғылы оқиғадан аман қалған үш адамның бірі. Анасының айтуынша, әскери қызметшілер суға кеткенде, Бекет жағаға өзі жүзіп шыққан. Жақындары оқиғаның мән-жайын тек таңертең Ақтауға келгенде ғана білді, - деп хабарлайды Tengri Life тілшісі "Ақ Жайық" басылымына сілтеме жасап.

Каспийде аман қалған екінші сарбаздың жағдайы туралы не белгілі?

Бұған дейін қайғылы оқиғадан кейін әскери қызметшінің ауруханаға жатқызылғаны хабарланған болатын. Туыстары Бекеттің тірі қалғанын білгенімен, оны ауруханаға жеткізді деп ойлаған. Тек таңертең Ақтауға жетіп, ұлымен кездескенде ғана оның ауруханада емес екенін білген.

Сарбаздың анасы Қарлығаш Мырзағалиеваның айтуынша, қазіргі уақытта Бекеттің жағдайы жақсы және ол өзі жүріп-тұра алады.

"Аллаға шүкір, ұлым аман. Таңертең Ақтауға келіп, өз көзімізбен көрдік. Ол дін аман, өздігінен жүріп-тұрады. Сын сағатта өз күшімен жағаға жеткен. Қалған жағдайлар тексерістен кейін белгілі болады", - деді ол.

Бекет Мырзағалиев Атырау облысы Махамбет ауылының тумасы. Ол мерзімді әскери қызметке 2025 жылдың 3 қазанында аттанып, Ақтау қаласындағы №29011 әскери бөлімінде борышын өтеп жүрген.

Бекеттің анасының айтуынша, бұл жағдай жас сарбаздар үшін ауыр сынақ болды.

"Балаларымыз әлі жас, бұл оқиға олардың өмір бойы есінде қалады", - деді әйел.

Сондай-ақ ол қаза тапқан сарбаздардың отбасына көңіл айтты.

"Бұл бүкіл Қазақстан үшін өте ауыр қайғы. Қазір әке-шешелерінің қандай күйде екенін сөзбен жеткізу мүмкін емес. Барлық қаза болған жігіттердің әке-шешелеріне шын жүректен қайғырып көңіл айтамын. Енді ешкім мұндайды бастан кешірмесін", - деді Қарлығаш Мырзағалиева.

Қайғылы оқиғаның мән-жайы тергеу аясында анықталып жатыр.

Қаза тапқандардың жақындары естеліктерін бөлісіп жатыр

Сонымен қатар, әлеуметтік желілерде қаза тапқан әскери қызметшілердің туыстары, достары мен сүйіктілері отбасылық мұрағаттағы суреттер мен бейнежазбаларды жариялап жатыр.

20 жастағы Азамат Мәдиханның отбасы үшін қайғылы оқиға алдындағы соңғы күндер оның үйге оралуын күтумен өтуі керек еді. Оның қызмет мерзімінің аяқталуына тоғыз күн қалған болатын. Туыстары оны қарсы алуға дайындалып, көрші-қолаң мен ағайынның басын қосып, үлкен той жасауды жоспарлаған еді.

Скриншот: Threads

Әлеуметтік желілерде басқа да сарбаздардың отбасылық кадрлары - серуендеген сәттері, кездесулері, әңгімелері мен күнделікті өмірлері жарияланып жатыр.

Скриншот: Threads

Кейбір туыстары сарбаздармен соңғы хат алмасуларын бөлісіп жатыр. Онда күнделікті әңгімелер, болашаққа құрылған жоспарлар мен тілектер айтылған. Енді бұл хабарламалар отбасылары үшін жақындарынан қалған естелікке айналды.

Скриншот: Threads

Маңғыстау облысындағы қайғылы оқиға

24 қыркүйекте Маңғыстау облысында әскери-теңіз жаттығулары кезінде әскери қызметшілер Каспий теңізінде суға ағып кеткен. Олар оқу-жаттығу-жауынгерлік тапсырмаларды орындап жатқанда, ауа райы күрт бұзылып, жел күшейген.

Бастапқыда 19 әскери қызметші суға кеткені хабарланған болатын. Кейін Маңғыстау облысының әкімдігі 17 адам екенін нақтылады.

Сонымен қатар бүгін, 25 қыркүйекте екі әскери қызметші - сержант Мансұр Ғұмаров пен матрос Мирас Тұрдыбекұлының денесі табылды. Қайғылы оқиғадан 14 адам қаза тапты.

Қайғылы оқиғаны тергеу үшін үкіметтік комиссия құрылды. Оны премьер-министрдің орынбасары Қанат Бозымбаев басқарады. Комиссия қайғылы оқиғаның себептерін анықтап, қаза тапқандардың отбасыларына көмек көрсетуі тиіс.

Әскери қызметшілердің қаза болу дерегі бойынша соталды тергеп-тексеру басталды. Бұл туралы Бас прокуратура хабарлады. Тергеушілер оқиғаның барлық мән-жайын анықтап жатыр.

Президент Қасым-Жомарт Тоқаев қаза тапқан әскери қызметшілердің туған-туыстарына көңіл айтты. Мемлекет басшысы 25 қыркүйекті жалпыұлттық аза тұту күні деп жариялады.

Тағы оқыңыз:

Қорғаныс министрлігі Каспийдегі іздеу операциясының кадрларын көрсетті

“Үйінде асыға күткен еді“. Каспийде қаза тапқан әскери қызметшілердің жақындары соңғы естеліктерін бөлісті

Жүзіп шығып, досын іздеген: Маңғыстауда аман қалған сарбаздың видеосы пайда болды

Бізді Google-дың негізгі дереккөздер тізіміне қосыңыз

Қосу