Жалға берілетін тұрғын үй Алматыда 400 ге жуық пәтер бөлінеді

Алматының Жетісу ауданында 198 жалдамалы пәтер беріле бастады және өткен кезеңнен қалған 181 пәтер қайта бөлініп жатыр. Тengri Нome баспананың қай жерден берілетінін, оны кімдер ала алатынын және мемлекеттен ұсыныс алғандар не істеуі керектігін түсіндіреді.

Поделиться

Алматыда өткен кезең аясында түрлі себептермен ресімделмей қалған 181 жалдамалы пәтерді қайта бөлу басталды, деп хабарлады филиалдан Отбасы банкі.

Еске сала кетейік, 2024 жылы маусымда оңтүстік астанада 818 пәтер беру басталған болатын. Ол кезде Qargaly city, Shahar city, Kokjiek city, Alem city, Alma city, Sofia, Time city және Medeu city ТК-ден жалдамалы тұрғын үйлер ұсынылды. Кейбіреулер бұл нұсқадан бас тартса, енді бірі инвентаризациядан өтпеді, ал үшіншілері төлем қабілеттілігін растай алмады. Енді кезекте тұрған келесі үміткерлер осы пәтерлерге ие бола алады.

Бұдан бөлек, Жетісу ауданындағы "Кенесары" ТК-де 198 жалдамалы пәтерді бөлу басталады. Кезекте тұрғандарға 147 бір бөлмелі және 52 екі бөлмелі пәтер ұсынылады.

Кезектегілерге 1414 нөмірінен SMS-хабарламалар жолданады.

Жалдамалы тұрғын үй: 1414 нөмірінен SMS алғаннан кейін не істеу керек?

1414 нөмірінен хабарлама алғаннан кейін orken.otbasybank.kz сайтында инвентаризациядан өту қажет. Содан кейін ғана "Баспана маркет" (baspana.otbasybank.kz) порталында пәтерге келісім беруге немесе бас тартуға болады. Бұған бес жұмыс күні беріледі.

Егер үлгермесеңіз, пәтер кезектегі келесі адамға беріледі.

Қазақстанда жалдамалы тұрғын үйді қалай алуға болады?

Үміткерлердің кейінгі бес жыл ішінде меншігінде баспанасы болмауы және кезекте тұруы тиіс. Тұрғын үй кешеніндегі жалдамалы пәтерлердің 70 пайызы халықтың әлеуметтік осал топтарының сегіз санатына жататын кезектегілер арасында бөлінеді:

Ұлы Отан соғысының ардагерлері. Жеңілдіктері бойынша Ұлы Отан соғысының ардагерлеріне теңестірілген ардагерлер. Басқа мемлекеттердің аумағындағы ұрыс қимылдарының ардагерлері. Бірінші және екінші топтағы мүгедектігі бар адамдар. Мүгедектігі бар балаларды асырап отырған немесе тәрбиелеп отырған отбасылар. Жесірлер (тұл ерлер). "Алтын алқа", "Күміс алқа" алқаларымен марапатталған немесе бұрын "Батыр ана" атағын алған, сондай-ақ І және ІІ дәрежелі "Ана даңқы" ордендерімен марапатталған көпбалалы аналар және көпбалалы отбасылар. Жетім балалар, ата-анасының қамқорлығынсыз қалған балалар (оларға ТК-дегі пәтерлердің жалпы санының 20 пайызы беріледі).

ТК-дегі пәтерлердің қалған 30 пайызы кезекте тұрған басқа азаматтар арасында бөлінеді.

Мысалы: үйде 100 пәтер бар делік. Оның 70-ін бірінші кезектегі сегіз санатқа жататын жандар алады. Оның ішінде 20 пәтер жетім балаларға беріледі. Қалған 30 пәтер толық емес отбасыларға және кезектегі басқа да адамдарға үлестіріледі.

Өз кезегіңізді orken.otbasybank.kz сайтындағы "Есепте тұрған азаматтардың тізімі" бөлімінен тексеруге болады.

Тағы оқыңыз:

Отбасы банк ипотека ережелерін өзгертті: бұның нарық пен сатып алушыларға әсері қандай?

Google News арқылы жаңалықтарымызды қадағалаңыз

Жазылу

баспана жалға алу жалға беру пәтер Отбасы банк