Жалғыз жылаудан шаршадым : сотта Яна мен Ризуанның соңғы хаттары оқылды

Атырау облыстық мамандандырылған қылмыстық істер жөніндегі сотында Яна Легкодимова мен Ризуан Хайыржанов арасындағы хат алмасудың 13-томы оқылды. Бұл хаттар 2024 жылдың қыркүйек айының соңында, Яна қаза тапқанға дейін бір айдай бұрын жазылған. Оларды оқу бірнеше сағатқа созылды.

Хаттардан бастапқыда сезім мен қамқорлық байқалса, уақыт өте келе шаршау, қызғаныш пен реніш басым бола бастаған. Апта өткен сайын олардың арадары салқындап, сезім емес, кім бірінші бас тартады деген үнсіз тартысқа айналғандай.

«Сен маған керексің. Сені қандай болсаң да қабылдаймын, сыйлаймын. Жұмыстан кейін күтіп аласың ба?» — деп жазған Яна.

«Не үшін?» — деп жауап қатқан ол.

«Күн жақсы екен. Расында да серуендеуге шыққың келмей ме?»

«Қазір – жоқ.»

Яна байланыстың үзілмеуін қалаған сайын, Ризуан үнсіздікке көбірек бой алдыра бастаған.

«Мені бекер ашуландырма. Айтамын бәрін. Менімен келісу қиын. Ашуыма тиіп тұрсың. Маған суық қарап, елемей жүрсің. Жылаудан шаршадым. Енді жалғыз жылағым келмейді!»

«Мені қорқытқаннан, саған жеңіл болмайды. Сен тек басқа адамның жанын ауыртасың. Мен – тасжүрекпін».

Кейде «Келші, өтінем» деген қысқа хабарламаға, «Ок» деп жауап берген.

«Жай ғана кездесіп, бір-бірімізден ләззат ала аламыз. Бұл — махаббат емес, бұл әлдеқайда қорқынышты нәрсе», — деп жазған ол.

Бойжеткен үмітін үзбей жалғастырған:

«Мен сенің өміріңнің бір бөлшегі болғым келді. Егер бәрі осылай боларын білсем де, қайтадан осы жолды таңдар едім».

Кейінірек олардың әңгімелері қарым-қатынасты үзуге бағыттала бастайды.

«Мен жай ғана қоңырау шалдым, неге ашуланып отырсың? Бұрын да жұмысың көп болатын, бірақ ол кезде елеусіз қалдырмайтынсың. Өтінем, осының бәріне нүкте қойшы, мені жібер. Қайтып келуге мүмкіндік қалмасын деймін».

«Құшақтасып қоштасайық». 

«Сен тек менімен ғана қоштаспақсың, басқа адаммен емес. Бәрін де таста».

«Мен үнсіздігіммен азапты жеңілдетуге тырысамын. Егер сүйсең - талап етпе, қорқытпа. Сен өзің жібермейінше, ешқандай қоштасу көмектеспейді. Менің бар болуымның өзі - азап. Өлуім керек пе?». 

«Біз сөйлеспейміз», — деп жазды Яна.

«Мен өзімді бере алмаймын. Сен маған шарт қоясың, қорқытасың. Өзіңді теже. Қорқытып ұстай алмайсың. Ешқашан ойламаппын, сенен бостандық алу үшін осылай күресемін деп. Кеткім келеді, иә, мен жаманмын. Бірақ менің отбасым мен басқа адамға тиіспе», — деп жауап берген ол.

Бұл хаттарды сот залында дауыстап оқыды. Фотоаппараттардың жарқылы, камералардың жұмысы тоқтамады. Зал мен басқа қатысушыларды түсіруге рұқсат етілгенімен, айыпталушыларды түсіруге тыйым салынды. Бұл - олардың заңды құқығы.

Шыны қоршаудың ішінде отырған Ризуан залдағылардың көзқарасынан қашқан жоқ. Керісінше, өзін байсалды, тіпті сенімді ұстады.

Оның сыбайласы Алтынбек Қатимовпен бірге Янадан және оның сезімінен мәңгі құтылу жайын талқылағаны белгілі.

Ал бұған дейін оқылған хаттардан олардың қарым-қатынасы мүлде басқаша басталғаны байқалады. Ол кезде сөздерінде ыстық ықылас, қамқорлық пен сүйіспеншілік бар еді. Ризуан әсер қалдыруды жақсы білетін: сымбатты, күтімді, өзіне сенімді, сұңқардай келбетті жігіт бірден баурап алған. Янаға гүл сыйлап, тамақ әзірлеп беріп, тіпті оны көтеріп, алтыншы қабатқа дейін апарған кездері болған.

Сол кезде Яна оның өмірінде басқа қыз бар екенін әлі білмеген. Кейін білгенде, оны сатқындық деп қабылдады. Бұл олардың қарым-қатынасындағы өзгеріс болды. Осыдан кейін Ризуан өзінің қалыңдығының есімі айтылғанда ашуланатын болған. Ол есімді атамауды талап етіп, «басқа адам» деп атай бастаған. Яна Ризуанның қасында қалудың жалғыз жолы деп ойлап, бұл ережеге көнеді.

Қыздың анасы Галина Легкодимова: «Қызым үшін бұл — өміріндегі алғашқы сезім еді», — дейді.

– Оқу мен мансаптағы барлық жетістіктеріне қарамастан, ол әлі бала еді. Бұл адаммен бірге оның өмірінде бәрі алғаш рет болды. Бұл – оның алғашқы махаббаты еді, – деді анасы.

Сотта оқылған хаттардан сезімге толы романтиканың біртіндеп суығаны айқын көрінеді: бір адам жанын салып сүйсе, екіншісі тек бақылауды ұстауға тырысқан. Яна үшін бұл махаббат болса, ол тек бәрін бақылап, қарым-қатынасты аяқтағысы келген.

…Естеріңізге сала кетейік, 2024 жылы 18 қазанның кешінде Ризуан сыбайласы Алтынбекпен бірге Янаны кездесуге шақырып, көлік ішінде тұншықтырып өлтірген. Кейін денесін алып шығып, Жайық өзеніне тастаған. Қыздың сүйегі тек сегіз айдан соң, 2025 жылдың маусым айында, оны тастаған жерден жеті шақырым қашықтықтан табылды.

Анастасия ШЕРСТЯНКИНА

Сурет, видео автордікі

Бүгін, 18:00