Яна Легкодимова ісі: сотта айыпталушылардан жауап алынды

Судья Зарема Хамидуллина төрағалық ететін сотта атышулы қылмыстық іс – Яна Легкодимованың өлімі бойынша тыңдалымдар жалғасуда. Отырыста айыпталушылар Ризуан Хайржанов пен Алтынбек Катимовтан жауап алынды.

Хайржанов кінәсін мойындап, Янаның анасы мен елден кешірім сұрады.

– Кінәмді толық мойындаймын. Галина Юрьевнадан және Қазақстан халқының алдында кешірім сұраймын. Не істегенімді білемін, – деді ол.

Айыпталушы марқұмның телефонын ұрламағанын, оны жойғанын айтты. Тергеу деректері бойынша, ол айғақтар мен хат алмасуды жасыру үшін осылай істеген.

Сот залында Янаның анасы айыпталушыдан қызының не үшін өлтірілгенін сұрады. 

– Мен кешірім сұрадым, бірақ оны айтуға да ұяламын. Басқа қызбен қарым-қатынасымды аяқтағым келген, бірақ Яна өзіне қол салуы мүмкін деп қорықтым, – деп жауап берді бұған Хайржанов.

Ол өз әрекетін ештеңе ақтай алмайтынын мойындады.

Хайржанов тергеу кезінде берген айғақтарынан бас тартқандықтан, судья оның бұрынғы жауабын жария етті. Хаттамаға сәйкес, ол Атырау-Махамбет трассасында жанжал кезінде Янаны тұншықтырып өлтіргенін және денесін Талдыкөл өзеніне апарып, суға тастағанын айтқан. Хайржанов өз әрекетін аффект күйінде жасағанын, қорқып, жауапкершіліктен қашқанын түсіндірген.

Екінші айыпталушы Алтынбек Катимов та сұрақтарға жауап беруден бас тартты. Сот оның тергеу кезіндегі айғақтарын да жариялады. Онда ол досының айтқанымен жүргенін және бәрін әзіл деп ойлағанын жеткізген. Катимов оқиғаның трагедиямен аяқталатынын күтпегенін, бірақ Янаның денесін өзенге апаруға көмектескенін мойындады.

Тергеу материалдарында Катимовтың телефонынан «Сергек» камераларының жазбалары қанша уақыт сақталатыны және кісі өлтіру үшін қандай жаза қарастырылғаны туралы іздеу сұраулары табылғаны көрсетілген. Бұл айғақтар да іске тіркелген.

Сондай-ақ тергеу Яна мен Хайржанов арасындағы хат-хабарларды айыпталушының өзі өшіргенін анықтаған.

Сот барысында жәбірленуші тарап істі ұйымдасқан топ құрамында жасалған, алдын ала келісілген, адам ұрлау және жасыру белгілерімен қайта саралауды талап етті. Прокурор істі қазіргі айыптау шеңберінде қарауды ұсынғанымен, сот өтініштерді кейін қарауға қалдырды.

Қазіргі уақытта айыпталушыларға алдын ала сөз байласу арқылы адам өлтіру, қылмысты жасыру, қылмысты хабарламау және мүлікті ұрлау баптары бойынша айып тағылған.

Жәбірленуші тараптың адвокаты Ажар Абдил бұл қылмыс кездейсоқ жанжал емес, жүйелі сипаттағы әрекет екенін айтты.

– Біз прокуратураға наразылық жолдадық, себебі бұл істі ұйымдасқан топ құрамында жасалған адам өлтіру ретінде қайта саралау қажет деп есептейміз. Бұл Қылмыстық кодекстің 262-бабын — «ұйымдасқан қылмыстық топқа қатысу» бабын қосуды білдіреді, – деді ол.

Адвокаттың айтуынша, айыпты қайта саралау айыпталушылардың жағдайын ауырлатқанымен, оларға өмір бойы бас бостандығынан айыру жазасы қолданылуы мүмкін.

– Біз дәл осындай жазаны талап етеміз, өйткені бұл қылмыс мағынасыз әрі ерекше қатыгездікпен жасалды, – деді Абдил.

Оның айтуынша, істі ашуда Янаның жеке күнделігі маңызды рөл атқарған.

– Тергеу бағытты дәл осы күнделік арқылы анықтады. Айыпталушылар еш жерде көзге түспеген, ал жазбалар камера жазбалары мен хат-хабар алмасулармен қатар басты дәлелдердің бірі болды, – деп түсіндірді ол.

Адвокат сонымен қатар моральдық зиянды өтеу туралы азаматтық талап арыз берілетінін растады.

– Бұл заңмен көзделген. Сомасы қазір нақтылануда, талап сот процесі аяқталған соң ұсынылады, – деді Абдил.

Сот отырыстары жалғасуда.

Еске сала кетейік, қайғылы оқиға 2024 жылдың қазан айында болған. 18 қазанда Яна Легкодимова Ризуан Хайржановпен кездесуге кеткеннен кейін жоғалып кетті. Тергеу мәліметінше, жанжал кезінде ол Алтынбек Катимовпен бірге қызды өлтіріп, денесін Талдыкөл өзеніне тастаған.

Янаның анасы іздеу жұмыстарын өз бетімен бастап, полицияға жүгінген. Екі күдікті ұсталғанымен, қыздың денесі тек сегіз ай өткен соң — 2025 жылдың маусымында Атырау маңынан табылды.

Бұл істі сот қарауына 2025 жылдың жазында жіберген. Бірінші тыңдалым 17 қыркүйекте өтті. 22 қазанда сотта айыпталушылар мен марқұм арасындағы хат-хабарлар, 23 қазанда Янаның күнделігі мен жасырын тергеу деректері оқылды. Прокурор биллинг пен байланыс мұнараларының деректерін де ұсынды.

Қазіргі уақытта іс бойынша сот талқылауы жалғасып жатыр.