Жалпыұлттық коалиция қандай бағытта жұмыс істейді

Оның құрамына жетекші саяси партиялардың өкілдері, 300-ге жуық қоғамдық ұйым мен 200-ге жуық әр буынның, әр саланың мамандары еніп отыр. Әсіресе Қазақстанның Азаматтық альянсы коалиция аясында маңызды іс-шаралар ұйымдастырады. Альянс директоры Нұрас Ералы Jibek Joly телеарнасына сұхбат беріп, коалиция жұмысы туралы айтып берді.

Спикердің айтуынша, Жалпыұлттық коалицияның негізгі бағыттары – Конституциядағы өзгерістердің мазмұнын халыққа жеткізу және ашық алаң процесін қалыптастыру, тек ақпараттандыру емес, халық арасында кері байланыс мәдениетін қалыптастыру.

Қазіргі уақытта барлық аймақта түсіндіру жұмыстары жүріп жатыр, әрбір ауылда партиялардың жастар қанаты және альянс өкілдері іс-шаралар өткізеді.

— Коалиция аясында онлайн және оффлайн мыңдаған іс-шара өткізу жоспарланған. Қазақстанның Азаматтық альянсы қазірдің өзінде 20 аймақтың өкілдерімен бірлесіп, отызға жуық іс шаралар ұйымдастырды. Орталық кеңседе «Ұстаным» ұлттық пікірталас клубының екі отырыстары өтті. Бұл отырыстарға үкіметтік емес ұйымдар, жас көшбасшылар мен Мәжіліс, Сенат депутаттары келіп, ой-пікірлерін айтты, — деді Нұрас Ералы.

Сонымен бірге, альянс басшысы жұртшылықпен кездескенде қандай сұрақтар жиі қойылатынын айтып берді.

— Күнделікті қойылатын сұрақтардың бірі — «Конституциялық өзгерістер күнделікті өмірімізге қандай әсер тигізеді?» деген сұрақ. Одан бөлек, өкілетті органдар қаншалықты дамитыны, Конституциялық сот қызметі мен қоғамдық бақылау механизмдері қалай өзгереді деген сұрақтар келіп түскен. Әлеуметтік желіде коалиция парақшаларына сұрақтар қойып, жауап алуға болады, — деді Нұрас Ералы.

Сөз соңында спикер жаңа Конституцияның ең маңызды әрі адам өміріне тікелей әсер ететін өзгерістері жөнінде баяндады.

— Біріншіден өкілетті органдардың ықпалы артады. Бірпалаталы Құрылтай жүйесі. Ең басты артықшылық шешім қабылдау жылдамдығы. Халық Кеңесі құрылады, елдегі ең жоғарғы консультативті орган. Жергілікті аймақтардың мәселесін көтеріп, шешуге көмектеседі. Ұзақмерзімді перспективада қарайтын болсақ, бұл өзгерістер Әділетті Қазақстан қағидатына сәйкес жаңару, — деді ол.

Бұған дейін референдумды дайындау және өткізу кезеңінде қандай үгіттерге тыйым салынатынын жазған болатынбыз.

Еске сала кетсек, 2026 жылғы 15 наурызда жаңа Конституцияны қабылдау бойынша республикалық референдум өтеді.