​Жаңа BINOM мектебі және Келешек мектептері : Атырауда оқу жылының басына қанша оқу орны ашылады

Атырау облысында оқушы орындарының тапшылығын айтарлықтай азайту және оқушы саны көп сыныптардың жүктемесін жеңілдету көзделіп отыр. Жаңа 2026-2027 оқу жылының басына қарай аймақта төрт ірі заманауи мектепті пайдалануға беру жоспарланып отыр, деп хабарлайды Өңірлік коммуникация қызметі.

Облыстық білім басқармасының бас маманы Ренат Жалмұхановтың айтуынша, қазір өңірде ауқымды құрылыс жүріп жатыр — бір уақытта 17 білім беру нысаны бой көтеріп жатыр.

Облыс орталығы тұрғындары үшін басты жаңалық — 2 000 орындық жаңа BINOM мектебінің ашылуы болмақ. Ол сұранысқа ие ауданда — Махамбет атындағы Академиялық қазақ драма театрының жанында салынып жатыр.

Қыркүйек айында есігін айқара ашатын қалған үш мектеп облыс аудандарында «Келешек мектептері» ұлттық жобасы аясында тұрғызылып жатыр:

Екі мектеп Жылыой ауданында ашылады;

Тағы бір мектеп — Құрманғазы ауданында.

Ұлттық жоба жоспары бойынша Атырау облысында барлығы тоғыз «Келешек мектебінің» құрылысы қарастырылған. Оның төртеуі қазірдің өзінде жұмыс істеп, балаларды қабылдап жатыр. Олар: Водниково және Береке ауылдарындағы 1 200 орындық екі мектеп, Сарыөзек ауылындағы 300 орындық оқу орны және Жұлдыз-2 ықшамауданындағы 900 орындық үлкен мектеп.

Білім басқармасындағылар бұл заманауи нысандарды іске қосу тек жаңа қабырғалардың пайда болуы ғана емес екенін баса айтады. Бұл өңірдегі апаттық жағдайдағы оқу орындары мәселесін түпкілікті жоюға және балалар үшін қауіпсіз әрі жоғары технологиялық цифрлық орта қалыптастыра отырып, үш ауысымда оқыту тәжірибесінен арылуға мүмкіндік береді.

Бүгін, 16:36