Жаңа жол өңірлер дамуына жол ашады

Өңірлер арасындағы логистиканы жақсартып, жүк тасымалын арттыруға «Орталық – Батыс» көлік дәлізі ықпал етпек. Былтыр Ұлттық құрылтайдың Бурабайда өткен отырысында Мемлекет басшысы аталған көлік дәлізінің құрылысын бастау туралы Үкіметке тапсырма бергенін айтқан еді. 

«Бұл – маңызды инфрақұрылымдық жоба» деген Президент жаңа жолдың Торғай өңірінің де дамуына тың серпін беретінін атап өтті. 

Тың жобаның арқасында орталық пен батыс арасы жақындап, екі ара жүздеген шақырымға қысқаруға тиіс. 

«Орталық – Батыс» күрежолы орталықтан оқшау қалып, шалғай жатқан өңірлердің тамырына қан жүгіртуге тиіс. 896 шақырымдық жолмен тәулігіне үш мыңға дейін көлік өтеді. Жалпы саны 70 мың адам тұратын 13 елді мекеннің маңымен салынады. Бұл – жол құрылысына жергілікті мыңдаған тұрғын жұмысқа тартылады деген сөз. Ал құрылыс аяқталғанда жол бойында жүздеген кәсіпкерлік нысаны бой көтермек. Бастысы – «Батыс Қытай-Батыс Еуропа» дәлізіне қосылатын жолдың арқасында арадағы қашықтық 560 шақырымға қысқарады. 

Нұртілек Хасенов, ҚР Көлік министрлігі автомобиль жолдары комитеті басқармасының басшысы:

- Қазіргі кезде мысалы, Каспийге шығу үшін Орал арқылы, Атырау арқылы айналу керек болатын болса, бұл жол енді Каспийге шығаратын жол 500-600 шақырымдай қысқартатын болады. Бұл енді уақыт жағынан да, экономикалық жағынан да тиімді жоба болмақ. Жаңа атап өткендей, 21 учаске – 896 шақырым деген өте үлкен сандық көрсеткіш. Енді жоспарымыз бойынша 10-15 мың адам маусымға байланысты, құрылыс жұмыстарының басталып кетуіне байланысты тұрғындар, жұмысшылар тартылатын болады осы жобаға. 

Қазір Астанадан Ырғызға барам деген жолаушы 1438 шақырым жол жүреді. Яғни Атбасар, Есіл, Қостанай, Қарабұтақ арқылы Ырғызға барады. Ал жаңа жол бірден батысқа бет алады. Жантеке, Егіндікөл ауылдарымен өтіп, Арқалық пен Торғай үстімен Ырғызға тартады. Төте жолдың арқасында жолаушы діттеген жеріне тез жетеді. Жаңа бағыт Торғай өңірінің экономикасына серпін беретіні анық.

Нұртілек Хасенов, ҚР Көлік министрлігі автомобиль жолдары комитеті басқармасының басшысы:

- Үлкен, ұзақ жол болғаннан кейін жолдың бойындағы жол қызмет көрсету сервис орталықтары бой көтереді. Әсіресе жанар-жағармай құю станциялары, машиналарды жөндейтін бекеттер, қонақүйлер, тамақтандыру орталықтары сияқты. Бұл енді кәсіпкерлік субъектілердің қызығушылығына байланысты. Міндетті түрде сұраныс көбейеді. Себебі көліктің легі артқан сайын, жүретін халықтың саны артқан сайын қызмет көрсету орталықтары да жұмыс жасайтын болады. 

Жалпы биыл 11 мың шақырымнан астам жолда құрылыс жұмыстары жүргізіледі. Оның ішінде 2300 шақырым жаңадан салынып, қайта жаңғыртылса, 5 мың шақырымы күрделі және орташа жөндеуден өтеді. Сондай-ақ төрт мың шақырым жергілікті маңыздағы жол жөнделеді. 

Негізгі жобалар қатарында «Қызылорда-Жезқазған» автожолы бар. Құрылыстың ұзындығы – 208 шақырым. Сондай-ақ 232 шақырымдық «Ақтөбе-Ұлғайсын», 572 шақырымдық «Қарағанды – Жезқазған» жолдарындағы жұмыстар жалғасады. Бұдан бөлек, бірнеше айналма жол жобасы жүзеге асады. СНХ.

Мақсат Қалиақпаров, ҚР Көлік вице-министрі:

- Ірі елді мекендерді жолдарды салу мен реконструкциялау ерекше назар аударылады. Атап айтқанда, Сарыағаш, Қызылорда, Петропавл және Рудный қалаларының айналма жолдары бойынша жобаларды іске асыру жоспарланып отыр. 

Бүгінде Қазақстан Еуразиядағы негізгі логистикалық торапқа айналды. Қазір әлемнің 42 еліне автокөлікпен жүк тасылады. Былтыр жүк көлемі 300 млн тоннаға жуықтады. Таяу жылдары бұл көрсеткіш өсе беретіні сөзсіз. Сондықтан автожол саласын барынша дамыту қажеттігі түсінікті.

Авторлары: Нұрқанат Қанапия, Ғалымжан Абдылахат, Айбек Омархан