SpaceX тің IPO алдындағы құны 1,8 трлн доллардан асуы мүмкін

Bloomberg мәліметінше, SpaceX аэроғарыш компаниясының алдағы IPO алдындағы бағасы кемінде 1,8 триллион долларға жетуі мүмкін.
Компания инвесторлармен және қаржылық кеңесшілермен жүргізілген талқылаулардан кейін бастапқы бағалау межесін сәл төмендеткен. Бұған дейін, сәуір айында SpaceX құны 2 триллион доллардан асады деген болжам айтылған еді.

Жоспарға сәйкес, компания 4 маусымда IPO-ның роуд-шоуын бастап, 11 маусымда акцияларды орналастыру бағасын нақтылауы мүмкін. IPO көлемі шамамен 75 миллиард долларға жетеді деп күтілуде. Егер бұл жоспар жүзеге асса, SpaceX 2019 жылы Saudi Aramco орнатқан 29 миллиард долларлық рекордтан асып түседі. Компания акциялары Nasdaq биржасында SPCX тикерімен саудалануы ықтимал.

Осы айдың басында жарияланған IPO проспектісіне сәйкес, компанияның 2025 жылғы түсімі 33 пайызға өсіп, 18,67 миллиард долларға жеткен. Алайда ғылыми зерттеулер мен жаңа технологияларды әзірлеуге жұмсалған шығындардың жоғары болуына байланысты SpaceX 4,94 миллиард доллар көлемінде таза шығын тіркеген.

2002 жылы Марсты игеру миссиясын мақсат етіп құрылған SpaceX компаниясын оның негізін қалаушы Илон Маск әлі де толық бақылауда ұстап отыр. Ол компанияның бас директоры әрі ең ірі акционері саналады.

1 мамырдағы дерек бойынша, Маск дауыс беру құқығының 85 пайызына ие және сегіз адамнан тұратын директорлар кеңесін басқарады.

Айта кетейік, биыл ақпан айында SpaceX Илон Маскқа тиесілі xAI жасанды интеллект стартапын сатып алған болатын. Осы мәміледен кейін біріккен компанияның құны 1,25 триллион доларға бағаланған еді.